ପଞ୍ଚଭୂତରେ ବିଲୀନ ହେଲେ ମନମୋହନ…..

ରିପୋର୍ଟ କାର୍ଡ / ନୂଆଦିଲ୍ଲୀ

ପାଞ୍ଚ ଭୂତରେ ବି ଲୀନ ହେଲେ ଭାରତର ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂ | ଆଜି ନିଗମବୋଧ ଘାଟରେ ରାଜକୀୟ ସମ୍ମାନ ସହ ମନମୋହନଙ୍କ ଅନ୍ତିମସଂସ୍କାର ହୋଇଛି। ଶିଖ ଧର୍ମର ରୀତିନୀତି ଏବଂ ପରମ୍ପରା ଅନୁଯାୟୀ ମନମୋହନ ସିଂଙ୍କ ଶେଷ ରୀତିନୀତି କରାଯାଇଥିଲା | ଶିଖ ଧର୍ମରେ, ଅନ୍ତିମ ସଂସ୍କାର ହିନ୍ଦୁ ଧର୍ମ ସହିତ କିଛି ମାତ୍ରାରେ ସମାନ। ହିନ୍ଦୁ ଧର୍ମରେ ଯେପରି ମୃତଦେହକୁ ପୋଡି ଦିଆଯାଏ ସେହିଭଳି ଶିଖ ଧର୍ମରେ ମୃତ ଶରୀରକୁ ଅନ୍ତିମ ସଂସ୍କାର ଦିଆଯାଏ।

ରାଷ୍ଟ୍ରପତି ଦ୍ରୌପଦୀ ମୁର୍ମୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ସ୍ବରାଷ୍ଟ୍ରମନ୍ତ୍ରୀ ଅମିତ ଶାହ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, କଂଗ୍ରେସ ସାଂସଦ ସୋନିଆ ଗାନ୍ଧୀ, ବିରୋଧୀ ଦଳ ନେତା ତଥା ସାଂସଦ ରାହୁଲ ଗାନ୍ଧୀ, ସାଂସଦ ପ୍ରିୟଙ୍କା ଗାନ୍ଧୀ, ଦଳର ସଭାପତି ମଲ୍ଲିକାର୍ଜୁନ ଖଡଗେ ପ୍ରମୁଖଙ୍କ ସମେତ ବିଶିଷ୍ଟ ବ୍ୟକ୍ତିବିଶେଷମାନେ ପାର୍ଥିବ ଶରୀରରେ ପୁଷ୍ପମାଲ୍ୟ ଅର୍ପଣ କରି ଶେଷ ଶ୍ରଦ୍ଧାଞ୍ଜଳି ଜଣାଇଥିଲେ। ଭୁଟାନ ରାଜା ଜିଗମେ ଖେସର ନାମଗେଲ ୱାଙ୍ଗଚୁକ, ଉପରାଷ୍ଟ୍ରପତି ଜଗଦୀପ ଧନଖଡ଼ ପ୍ରମୁଖ ଉପସ୍ଥିତ ଥିଲେ। ତିନି ସେନା ସ୍ଥଳସେନା, ବାୟୁସେନା ଏବଂ ନୌସେନା ପକ୍ଷରୁ ପାର୍ଥିବ ଶରୀରକୁ ସଲାମୀ ଦିଆଯାଇଥିଲା। ଶେଷରେ ଚିତାରେ ମୁଖାଗ୍ନୀ ଦିଆଯାଇଥିଲା। ଗୁରୁବାର ରାତିରେ ଦିଲ୍ଲୀ ଏମ୍ସରେ ଚିକିତ୍ସାଧିନ ଅବସ୍ଥାରେ ୯୨ ବର୍ଷ ବୟସରେ ମନମୋହନ ସିଂହ ଇହଲୀଳା ସମ୍ବରଣ କରିଥିଲେ।