ବନ୍ଦ କରିଦେଲେ ମାଇକ୍‌, ନିତି ଆୟୋଗ ବୈଠକ ଅଧାରୁ ଉଠି ଚାଲିଗଲେ ମମତା……

ରିପୋର୍ଟ କାର୍ଡ / ନୂଆଦିଲ୍ଲୀ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ବସିଛି ନିତି ଆୟୋଗ ପରିଚାଳନା ପରିଷଦ ବୈଠକ। ତେବେ ବୈଠକରେ ଏକ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଛି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ବୈଠକ ଅଧାରୁ ଉଠି ଚାଲିଯାଇଛନ୍ତି। ତାଙ୍କୁ ବୈଠକରେ କଥା କହିବାକୁ ଅଧିକ ସମୟ ନ ମିଳିବାରୁ ସେ ଅସନ୍ତୋଷ ପ୍ରକାଶ କରି ଉଠିଯାଇଥିଲେ। ବୈଠକରେ ପ୍ରଧାନମନ୍ତ୍ରୀ ମୋଦୀଙ୍କ ସମେତ ନିତି ଆୟୋଗର ସଦସ୍ୟ, ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀ, ସଚିବ ଏବଂ ବରିଷ୍ଠ ଅଧିକାରୀମାନେ ଉପସ୍ଥିତ ରହିଥିଲେ। ବୈଠକରେ ମତ ରଖିବାକୁ ୫ ମିନିଟ ସମୟ ଦିଆଯାଇଥିଲା। ମମତା ନିଜ ମତ ରଖିଥିଲେ। କିନ୍ତୁ ସେ ୫ ମିନିଟରୁ ଅଧିକ ସମୟ କହିବାକୁ ଚାହୁଁଥିଲେ। ହେଲେ ୫ ମିନିଟ ହେବା କ୍ଷଣି ତାଙ୍କ ମାଇକ ବନ୍ଦ କରିଦିଆଯାଇଥିଲା, ଯେଉଁଥିରେ ମମତା ବିରକ୍ତି ପ୍ରକାଶ କରି ଅଧାରୁ ବୈଠକରୁ ଉଠି ପଳାଇଥିଲେ। ବାହାରକୁ ଆସି ମମତା ଗଣମାଧ୍ୟମକୁ କହିଛନ୍ତି ଯେ, ମୁଁ ମତ ରଖିବା ସମୟରେ ମୋ ମାଇକ ବନ୍ଦ କରିଦିଆଯାଇଥିଲା। ମୁଁ ଏଭଳି ପାତର ଅନ୍ତର କ’ଣ ପାଇଁ କରାଯାଉଛି ବୋଲି ପଚାରିଥିଲି। କୌଣସି ବିରୋଧୀ ଦଳ ବୈଠକକୁ ଆସିଲେ ନାହିଁ। ମୁଁ ଏକମାତ୍ର ବିରୋଧୀ ଦଳ ଭାବେ ବୈଠକକୁ ଆସିଛି, ତୁମେମାନେ ଖୁସି ହେବା କଥା। କିନ୍ତୁ ତୁମେମାନେ ତୁମ ସରକାରକୁ ପ୍ରାଥମିକତା ଦେଉଛ। ଏଭଳି ଅଧାରୁ ମାଇକ୍‌ ବନ୍ଦ କରିଦିଆଯିବା କେବଳ ମୋତେ ଅପମାନ ନୁହେଁ, ବରଂ ପଶ୍ଚିମବଙ୍ଗ ଏବଂ ସମସ୍ତ ଆଞ୍ଚଳିକ ଦଳଗୁଡ଼ିକ ପ୍ରତି ଅପମାନ ବୋଲି ମମତା କହିଛନ୍ତି।