ଦେଶବ୍ୟାପୀ ଲକଡାଉନ ସହିତ ଅସ୍ଥାୟୀ ଡାକ୍ତରଖାନା ଏବଂ ଟିକାକରଣ କାର୍ଯ୍ୟ ତ୍ୱରାନ୍ୱିତ କରିବାକୁ ଫୋୖସିଙ୍କ ପରାମର୍ଶ…..

ରିପୋର୍ଟ କାର୍ଡ / ନୂଆଦିଲ୍ଲୀ

ଭାରତରେ କରୋନା ସଂକ୍ରମଣକୁ ନିୟନ୍ତଣ ପାଇଁ ଦେଶବ୍ୟାପୀ ଲକଡାଉନ ଘୋଷଣା ନିହାତି ଆବଶ୍ୟକ | ଏହା ସହିତ ବିଭିନ୍ନ ସ୍ଥାନରେ ବହୁସଂଖ୍ୟାରେ ଅସ୍ଥାୟୀ ଡାକ୍ତରଖାନା ନିର୍ମାଣ ଏବଂ କୋଭିଡ ପ୍ରତିଷେଧକ ଟିକାକରଣ କାର୍ଯ୍ୟ ତ୍ୱରାନ୍ୱିତ କରିବାକୁ ହ୍ୱାଇଟ ହାଉସର ମୁଖ୍ୟ ଡାକ୍ତରୀ ପରାମର୍ଶଦାତା ଡା.ଆନ୍ଥୋନି ଫୋୖସି ପରାମର୍ଶ ଦେଇଛନ୍ତି। କହିଛନ୍ତି କି ଭାରତର ସ୍ଥିତି ଅତ୍ୟନ୍ତ ଜଟିଳ ବୋଲି ବିଶ୍ୱର ଯେକେହି ଜାଣନ୍ତି। ଡା. ଆନ୍ଥୋନି କହିଛନ୍ତି, ଯେତେବେଳେ ଏତେ ସଂଖ୍ୟକ ଲୋକ ସଂକ୍ରମିତ ହେଉଛନ୍ତି, ପ୍ରତ୍ୟେକଙ୍କ ଯତ୍ନ ନେବାକୁ ପର୍ଯ୍ୟାପ୍ତ ସ୍ୱାସ୍ଥ୍ୟସେବା ସାମର୍ଥ୍ୟର ଅଭାବ ରହିଛି, ଡାକ୍ତରଖାନାରେ ଶଯ୍ୟାର ଅଭାବ, ଅମ୍ଳଜାନ ଅଭାବ, ଚିକିତ୍ସା ସାମଗ୍ରୀ ଯୋଗାଣରେ ନିଅଣ୍ଟିଆ ଅବସ୍ଥା ରହିଛି, ସେତେବେଳେ ଅତ୍ୟନ୍ତ ହତାଶାଜନକ ପରିସ୍ଥିତି ସୃଷ୍ଟି ହେବା ସ୍ୱାଭାବିକ। ସେଥିପାଇଁ ସାରା ବିଶ୍ୱ ଯଥାସମ୍ଭବ ସହାୟତା କରିବା ଦିଗରେ ଆଗେଇ ଆସିବା ଆବଶ୍ୟକ। ଆମେରିକାର ଜାତୀୟ ଆଲର୍ଜି ଓ ସଂକ୍ରାମକ ରୋଗ ପ୍ରତିଷ୍ଠାନର ନିର୍ଦ୍ଦେଶକ ଥିବା ଡା.ଫୋୖସି କହିଛନ୍ତି, ଭାରତକୁ ମଧ୍ୟମ ଓ ଦୀର୍ଘସୂତ୍ରୀ ଆକାରରେ କେତେକ ପଦକ୍ଷେପ ନେବାକୁ ପଡିବ। ସେ କହିଛନ୍ତି, ଯେତେ ଅଧିକ ସମ୍ଭବ ଲୋକଙ୍କର ଟିକାକରଣ କରିବାକୁ ହେବ। ଭାରତରେ ଉତ୍ପାଦିତ ହେଉଥିବା ଟିକା ସହିତ ବିଦେଶରୁ ଯୋଗାଇ ଦିଆଯାଉଥିବା ଟିକା ଭାରତର ଜନସାଧାରଣଙ୍କୁ ଦେବାକୁ ପଡିବ। ତାହା ଏବେ ଚାଲିଛି। ତତ୍‍ସହିତ କିଛିଦିନ ପାଇଁ ଦେଶବ୍ୟାପୀ ସଂପୂର୍ଣ୍ଣ ତାଲାବନ୍ଦ ଘୋଷଣା କରିବାର ଆବଶ୍ୟକତା ରହିଛି, ଯାହା ଚୀନ, ନ୍ୟୁଜିଲାଣ୍ଡ ଭଳି ରାଷ୍ଟ୍ର କରିଥିଲେ। ତାଲାବନ୍ଦ ହେବାଦ୍ୱାରା କରୋନା ସଂକ୍ରମଣ ବ୍ୟାପିବାକୁ ନିଶ୍ଚିତ ଭାବରେ ରୋକାଯାଇପାରିବ। ଏସବୁ ସହିତ ଦେଶବ୍ୟାପୀ ବହୁ ସଂଖ୍ୟାରେ ଅସ୍ଥାୟୀ ଡାକ୍ତରଖାନା ନିର୍ମାଣ କରିବାକୁ ପରାମର୍ଶ ଦେଇଛନ୍ତି। ଏଥିପାଇଁ ଭାରତୀୟ ସେନାର ସହାୟତା ଲୋଡିବାକୁ ସେ କହିଛନ୍ତି। ଏହାଦ୍ୱାରା ଜଣେ ଅସୁସ୍ଥ ହୋଇ ଚିକିତ୍ସା ଆବଶ୍ୟକ କରିବା ସମୟରେ ତାଙ୍କୁ ଡାକ୍ତରଖାନାର ଏକ ଶଯ୍ୟା ମିଳିପାରିବ ବୋଲି ଡା.ଫୋୖସି କହିଛନ୍ତି।