ଆସିବ ନୂଆ ବିସ୍ଥାପନ ଓ ଥଇଥାନ ନୀତି…..

ରିପୋର୍ଟ କାର୍ଡ / ଭୁବନେଶ୍ୱର

ଶିଳ୍ପାନୁଷ୍ଠାନ ଦ୍ୱାରା ବିସ୍ଥାପିତ ପ୍ରତ୍ୟେକ ବ୍ୟକ୍ତିଙ୍କ ପାଖରେ ପର୍ଯ୍ୟାପ୍ତ ପରିମାଣର ସହାୟତା ପହଞ୍ଚିଛି କି ନାହିଁ ତାହାର ଅନୁଧ୍ୟାନ କରାଯିବ। ରାଜ୍ୟସ୍ତରରେ ୨୦୦୬ ବିସ୍ଥାପନ ଓ ଥଇଥାନ ନୀତିକୁ ଆମେ ପରିବର୍ତ୍ତନ କରିବାକୁ ଯାଉଛି। ସମସ୍ତଙ୍କ ପରାମର୍ଶକ୍ରମେ ୨୦୨୫ ଜାନୁଆରୀ, ଫେବ୍ରୁଆରୀରେ ସାରା ଓଡ଼ିଶା ନୂତନ ବିସ୍ଥାପନ ଓ ଥଇଥାନ ନୀତି ଦେଖିବ। ରାଜସ୍ୱ ଆଇନର ସଂସ୍କାର ଦେଖିବେ ରାଜ୍ୟବାସୀ। ରାଜସ୍ୱ ନିୟମାବାଳୀରେ ପରିବର୍ତ୍ତନ କରାଯିବ। ରାଜସ୍ୱ ବିଭାଗକୁ ଅଧିକ ଶକ୍ତିଶାଳୀ କରିବାକୁ ବ୍ୟାପକ ପରିବର୍ତ୍ତନ ହେବ ବୋଲି ରାଜସ୍ୱ ମନ୍ତ୍ରୀ ସୁରେଶ ପୂଜାରୀ କହିଛନ୍ତି। ରାଜ୍ୟ ବିକାଶରେ ରାୟଗଡ଼଼ା ଜିଲ୍ଲା ଏନ୍ତୁଡିଶାଳ ହେବ। ରାୟଗଡ଼଼ା ସହ ଅବିଭକ୍ତ କୋରାପୁଟ ଜିଲ୍ଲା ରହିଛି। ଏହି ଜିଲାରେ ସବୁଠାରୁ ଅଧିକ ଜନଜାତି ସମ୍ପ୍ରଦାୟର ଲୋକ ରହୁଛନ୍ତି। ଅଧିକାଂଶ ଜନଜାତିଙ୍କ ପାଖରେ ଆଜି ମଧ୍ୟ ସ୍ୱାଧୀନତାର ସ୍ୱାଦ ପହଞ୍ଚି ପାରିନାହିଁ। ମିଳିମିଶି କିପରି ସମସ୍ତଙ୍କ ପାଖରେ ବିକାଶ ପହଞ୍ଚିଇବା ସେ ନେଇ କାମ କରିବାକୁ ବିଭାଗୀୟ ଅଧିକାରୀମାନଙ୍କୁ ନିଦେଶ ଦିଆଯାଇଛି। ରାୟଗଡ଼଼ା ଜିଲାରେ ଧାନମଣ୍ଡି ଦଲାଲମୁକ୍ତ କରିବାକୁ ସବୁ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ଚାଷୀମାନେ ସେମାନଙ୍କର ଉଚିତ ମୂଲ୍ୟ କିପରି ପାଇବେ ସେ ନେଇ ପ୍ରଶାସନ ଧ୍ୟାନ ଦେବା ଆବଶ୍ୟକ । ରାୟଗଡ଼଼ାର ମା’ ମଝିଘରିଆଣୀଙ୍କ ଜମି କିପରି ମନ୍ଦିର ଟ୍ରଷ୍ଟକୁ ଫେରିବ ସେ ନେଇ ପଦକ୍ଷେପ ନିଆଯିବ ବୋଲି କହିଛନ୍ତି। ଦିନିକିଆ ରାୟଗଡ଼଼ା ଗସ୍ତରେ ଆସି ଶ୍ରୀ ପୂଜାରୀ ମା’ ମଝିଘରିଆଣୀଙ୍କ ଦର୍ଶନ କରିବା ସହ ପୂଜାର୍ଚ୍ଚନା କରିଥିଲେ। ଏହି ଗସ୍ତ ସମୟରେ ବିଜେପି ଜିଲା ସଭାପତି ଶିବ ପଟ୍ଟନାୟକ, ସାଂସଦ ପ୍ରାର୍ଥୀ କାଳୀରାମ ମାଝୀଙ୍କ ସମେତ ଦଳୀୟ ବହୁ ନେତୃବୃନ୍ଦ ଉପସ୍ଥିତ ଥିଲେ।