ବାଚସ୍ପତି ନିରପେକ୍ଷ ରୁହନ୍ତୁ……

ରିପୋର୍ଟ କାର୍ଡ / ନୂଆଦିଲ୍ଲୀ

ଶାସକ ବିଜେପି ନେତୃତ୍ୱାଧୀନ ମେଣ୍ଟ ପାଖରେ ଯଥେଷ୍ଟ ସଂଖ୍ୟା ଥିବାରୁ ଓମ୍ ବିର୍ଲା ଲୋକସଭା ବାଚସ୍ପତି ଭାବେ ପୁନଃନିର୍ବାଚିତ ହୋଇଛନ୍ତି। ଏହାପରେ କଂଗ୍ରେସର ରାହୁଲ ଗାନ୍ଧୀଙ୍କ ସମେତ ବିରୋଧୀ ନେତାମାନେ ବିର୍ଲାଙ୍କୁ ଅଭିନନ୍ଦନ ଜଣାଇବା ସହ ନିରପେକ୍ଷ ଗୃହ ପରିଚାଳନା ପାଇଁ ଅନୁରୋଧ ଜଣାଇଛନ୍ତି। କଂଗ୍ରେସର କୋଡିକୁନିଲ ସୁରେଶଙ୍କୁ ସମର୍ଥନ କରୁଥିବା ବିରୋଧୀ ସାଂସଦମାନେ ରାଜସ୍ଥାନର କୋଟାରୁ ତିନି ଥର ବିଜେପି ସାଂସଦ ଥିବା ବିର୍ଲାଙ୍କୁ ଗୃହ ପରିଚାଳନାରେ ନିରପେକ୍ଷତାକୁ ସୁନିଶ୍ଚିତ କରିବା ଏବଂ ସେମାନଙ୍କ ସଦସ୍ୟମାନଙ୍କୁ ଗୃହରେ ବିଭିନ୍ନ ସମସ୍ୟା ଉତ୍ଥାପନ ଓ ଆଲୋଚନା କରିବା‌ ପାଇଁ ସମୟ ଦେବାକୁ ଅନୁରୋଧ କରିଛନ୍ତି। ଗତବର୍ଷ ସାଂସଦମାନଙ୍କୁ ଅଚାନକ ସାମୂହିକ ନିଲମ୍ବନ ଘଟଣାକୁ କିଛି ବିରୋଧୀ ସାଂସଦ ସମାଲୋଚନା କରିଥିଲେ। କେରଳର ତିରୁଅନନ୍ତପୁରମରୁ ପୁଣି ଥରେ ନିର୍ବାଚିତ ହୋଇଥିବା କଂଗ୍ରେସ ସାଂସଦ ଶଶୀ ଥରୁର ଏହି ନିଲମ୍ବନକୁ ଗଣତନ୍ତ୍ର ପ୍ରତି ବିଶ୍ୱାସଘାତକତା ବୋଲି କହିଛନ୍ତି। ସମାଜବାଦୀ ପାର୍ଟି ନେତା ଅଖିଳେଶ ଯାଦବ ଓମ୍ ବିର୍ଲାଙ୍କୁ ସବୁ ସାଂସଦଙ୍କ ପ୍ରତି ସମାନ ବ୍ୟବହାର କରିବାକୁ ଅନୁରୋଧ କରିବା ସହ ଆଉ ଗଣନିଲମ୍ବନ ହେବ ନାହିଁ ବୋଲି ଆଶା ପ୍ରକାଶ କରିଥିଲେ। ତୃଣମୂଳ ନେତା ସୁଦୀପ ବନ୍ଦ୍ୟୋପାଧ୍ୟାୟ ଏବଂ ଡିଏମ୍‌କେ ସାଂସଦ ଟିଆର୍‌ ବାଲୁ ମଧ୍ୟ ସମାନ ନିବେଦନ କରିଛନ୍ତି। ବାଲୁ ନୂଆ ବାଚସ୍ପତିଙ୍କୁ ମନେ ପକାଇ ଦେଇଛନ୍ତି ଯେ ସେ ଏବେ କୌଣସି ଦଳର ନୁହନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଓମ୍ ବିର୍ଲାଙ୍କୁ ଅଭିନନ୍ଦନ ଜଣାଇବା ସହ ଗୃହରେ ଲୋକଙ୍କ ଆଶା ପୂରଣ କରିବାରେ କୋଟା ବିଧାୟକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ ବୋଲି କହିଛନ୍ତି। କଂଗ୍ରେସ ୮ ଥର ସାଂସଦ ଥିବା କେ ସୁରେଶଙ୍କୁ ପ୍ରାର୍ଥୀ କରିବାରୁ ଆଜି ବାଚସ୍ପତି ପଦ ପାଇଁ ମତଦାନ ହୋଇଥିଲା। ତେବେ ଏହି ସଂଖ୍ୟା ବିର୍ଲାଙ୍କ ସପକ୍ଷରେ ରହିଥିଲା।