ପାକିସ୍ତାନରେ ବସ ବିସ୍ଫୋରଣ, ୧୩ ମୃତ, ସେଥିରେ ୯ ଚୀନ ଇଂଜିନିୟର….

ରିପୋର୍ଟ କାର୍ଡ / ନୂଆଦିଲ୍ଲୀ

ଆଜି ସକାଳେ ଉତ୍ତର ପାକିସ୍ତାନରେ ଏକ ବଡ଼ ଧରଣର ଆତଙ୍କବାଦୀ ଆକ୍ରମଣ ହମଲା ହୋଇଛି । ଖାଇବର ପଖତୁନଖ୍ବାବା ପ୍ରଦେଶରେ ନିର୍ମାଣାଧିନ ଦାସୁ ହାଇଡ୍ରୋ ପାଓ୍ବାର ପ୍ଲାଣ୍ଟକୁ ଯାଉଥିବା ଏକ ବସରେ ଆଇଇଡି ବିସ୍ଫୋରଣ ଘଟି ୧୩ ଜଣ ମୃତ୍ୟୁ ହୋଇଛି । ମୃତକଙ୍କ ମଧ୍ୟରୁ ୯ ଜଣ ଚୀନ ଇଂଜିନିୟର ଥିବା ଜଣାପଡ଼ିଛି । ପାକିସ୍ତାନୀ ଖବରକାଗଜ ଏକ୍ସପ୍ରେସ ଟ୍ରିବୁନରେ ପ୍ରକାଶିତ ରିପୋର୍ଟ ଅନୁସାରେ ବୁଧବାର ସକାଳ ସାଢେ ୭ଟା ସମୟରେ ପ୍ରାୟ ଚୀନା ଇଂଜିନିୟର, ଶ୍ରମିକ ଓ ପାକିସ୍ତାନୀ ସେନାର ଯବାନଙ୍କୁ ମିଶାଇ ମୋଟ ୩୦ ଜଣ ବ୍ୟକ୍ତି ପ୍ରକଳ୍ପସ୍ଥଳୀକୁ ଯାଉଥିବା ଏକ ବସରେ ଖଞ୍ଜାଯାଇଥିବା ଆଇଇଡି ବିସ୍ଫୋରଣ ହେବାରୁ ଘଟଣାସ୍ଥଳରେ ୧୩ ଜଣ ପ୍ରାଣ ହରାଇଥିଲେ । ତେବେ ବସରେ ଥିବା ଆଉ କିଛି ଯାତ୍ରୀ ଆହତ ହୋଇଛନ୍ତି ଓ କେତେକଙ୍କ ଅବସ୍ଥା ସଂକଟାପନ୍ନ ରହିଛି । ଏଣୁ ଆଗକୁ ମୃତ୍ୟୁ ସଂଖ୍ୟା ଆହୁରି ବଢିବାର ଆଶଙ୍କା ରହିଛି । ଏବେ ବି ଜଣେ ଚୀନ ଇଂଜିନିୟର ଓ ଜଣେ ଯବାନ ନିଖୋଜ ଅଛନ୍ତି ।ଏହି ଘଟଣା ପାଇଁ ଏପର୍ୟ୍ୟନ୍ତ କୌଣସି ସଂଗଠନ ନିଜକୁ ଦାୟୀ କରିନାହାନ୍ତି । ବିସ୍ଫୋରଣ ପରେ ସ୍ଥାନୀୟ ପ୍ରଶାସନ ପକ୍ଷରୁ ଉଦ୍ଧାର କାର୍ୟ୍ୟ ଜାରି ରହିଛି ।