୭୫୦୦ତମ ଜନଔଷଧି କେନ୍ଦ୍ର ଲୋକାର୍ପିତ କଲେ ପ୍ରଧାନମନ୍ତ୍ରୀ…..

ରିପୋର୍ଟ କାର୍ଡ / ନୂଆଦିଲ୍ଲୀ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶର ୭୫୦୦ତମ ଜନଔଷଧି କେନ୍ଦ୍ରକୁ ଆଜି ଲୋକାର୍ପିତ କରିଛନ୍ତି। ଏହି କେନ୍ଦ୍ର ମେଘାଳୟର ଶିଲଂର ନର୍ଥ ଇଷ୍ଟର୍ନ ଇନ୍ଦିରା ଗାନ୍ଧୀ ରିଜିଓନାଲ ଇନଷ୍ଟିଚ୍ୟୁଟ୍‌ ଅଫ୍‌ ହେଲଥ୍‌ ଆଣ୍ଡ୍‌ ମେଡ଼ିକାଲ ସାଇନ୍ସ୍‌ଠାରେ ରହିଛି। ମାର୍ଚ୍ଚ ୭ ଜନଔଷଧି ଦିବସ ସମାରୋହରେ ଭିଡ଼ିଓ କନଫରେନ୍ସିଂରେ ଯୋଗଦେଇ ମୋଦି କହିଛନ୍ତି ଯେ, ଏସବୁ କେନ୍ଦ୍ର ମାଧ୍ୟମରେ ଦେଶର ସାଧାରଣ ଜନତାଙ୍କୁ ସୁଲଭ ଦାମରେ ଉଚ୍ଚଗୁଣବତ୍ତାଯୁକ୍ତ ଔଷଧ ଯୋଗାଇ ଦିଆଯାଉଛି। ଏହାଦ୍ୱାରା ଗରିବ ଏବଂ ମଧ୍ୟବିତ୍ତ ବର୍ଗ ଅଧିକ ଉପକୃତ ହୋଇପାରୁଥିବା ସେ କହିଛନ୍ତି। ଜନଔଷଧି କେନ୍ଦ୍ର ଖୋଲିବା ଯୋଗୁ ବହୁ ଯୁବବର୍ଗଙ୍କ ଆର୍ଥିକ ବିକାଶ ସମ୍ଭବ ହୋଇପାରିଛି। ଇତିମଧ୍ୟରେ ୧୧ କୋଟିରୁ ଅଧିକ ସାନିଟାରୀ ପ୍ୟାଡ୍‌ ଏସବୁ କେନ୍ଦ୍ର ଦ୍ୱାରା ବିକ୍ରି ହୋଇଛି। ୧,୦୦୦ରୁ ଅଧିକ ଜନଔଷଧି କେନ୍ଦ୍ର ମହିଳାଙ୍କ ପରିଚାଳିତ ହେଉଥିବା ନେଇ ସେ ସୂଚନା ଦେଇଛନ୍ତି। ଏହି ଅବସରରେ ପ୍ରଧାନମନ୍ତ୍ରୀ ଏସବୁ କେନ୍ଦ୍ରରୁ ଔଷଧ କିଣିଥିବା ଲୋକଙ୍କ ସହିତ ମଧ୍ୟ ଆଲୋଚନ କରିଛନ୍ତି। କରୋନା ମହାମାରୀ ଲଢ଼େଇରେ ସ୍ବଦେଶୀ ଜ୍ଞାନକୌଶଳରେ ପ୍ରସ୍ତୁତ ଭାରତୀୟ ଟିକା ଏବେ ପୃଥିବୀରେ ପ୍ରସିଦ୍ଧି ହାସଲ କରିପାରିଥିବା ସେ କହିଛନ୍ତି। ଖୁବ୍‌ ଶୀଘ୍ର ଦେଶରେ ଜନଔଷଧି କେନ୍ଦ୍ର ସଂଖ୍ୟା ୧୦ ହଜାର ଛୁଇଁବ ବୋଲି ପ୍ରଧାନମନ୍ତ୍ରୀ ସୂଚନା ଦେଇଛନ୍ତି।