ସିଂହ କ୍ରୁର ଦେଖାଯାଉନାହିଁ, ମନ ଉପରେ ଏହା ନିର୍ଭର କରେ…..

ରିପୋର୍ଟ କାର୍ଡ / ନୂଆଦିଲ୍ଲୀ

ନୂଆ ସଂସଦ ଭବନରେ ଜାତୀୟ ଚିହ୍ନ ଅଶୋକ ସ୍ତମ୍ଭରେ ଥିବା ସିଂହ ହିଂସ୍ର ପରି ଦେଖା ଯିବା ଏବଂ ପ୍ରତିମୂର୍ତ୍ତି ଆଇନ ଉଲ୍ଲଂଘନ କରୁଥିବା ନେଇ ରାଜନୈତିକ ବିବାଦ ଦେଖା ଦେଇଥିଲା | ଏହି ପ୍ରତିମୂର୍ତ୍ତି ଆଇନ ଉଲ୍ଲଂଘନ କରୁନାହିଁ ବୋଲି ଆଜି ସୁପ୍ରିମକୋର୍ଟ କହିଛନ୍ତି | ଏହା ସହିତ କ୍ରୁର ପ୍ରତିମୂର୍ତ୍ତି ଦାବି ଉପରେ କୋର୍ଟ ମଧ୍ୟ ପ୍ରଶ୍ନ ଉଠାଇଛନ୍ତି। କୋର୍ଟ ଏହି ଆବେଦନକୁ ଖାରଜ କରି କହିଛନ୍ତି ଯେ ଏହା ବ୍ୟକ୍ତିଙ୍କ ମନ ଉପରେ ନିର୍ଭର କରେ। ବାସ୍ତବରେ, ସେଣ୍ଟ୍ରାଲ ଭିଷ୍ଟା ପ୍ରକଳ୍ପର ଏକ ଅଂଶ ଭାବରେ ସଂସଦ ଗୃହରେ ଏକ ସିଂହ ପ୍ରତିମୂର୍ତ୍ତି ସ୍ଥାପନ କରାଯାଇଥିଲା। ଆଉ ରାଜନୈତିକ ଦଳମାନେ ଏହାକୁ ନେଇ ପ୍ରଶ୍ନ ଉଠାଇଥିଲେ | କଂଗ୍ରେସ ସମେତ ଅନ୍ୟ କିଛି ବିରୋଧୀ ଦଳର ସାଂସଦ କହିଥିଲେ ଯେ ଏହି ପ୍ରତିମୂର୍ତ୍ତିରେ ଥିବା ସିଂହକୁ ଅଧିକ ଉଗ୍ର ଓ ଆକ୍ରମଣାତ୍କମ କରାଯାଇଛି। ପୁରୁଣା ଚିହ୍ନରେ ସିଂହ ସୌମ୍ୟ ଓ ସାଧାରଣ ଦେଖାଯାଉଥିଲା। ଅଶୋକ ସ୍ତମ୍ଭର ଏଭଳି ବଡ଼ ପରିବର୍ତ୍ତନ ଆମ ଜାତୀୟ ପ୍ରତୀକ ପ୍ରତି ଅପମାନ। କଂଗ୍ରେସ ପକ୍ଷରୁ କୁହାଯାଇଥିଲା ଯେ ଜାତୀୟ ସ୍ତମ୍ଭର ଶାନ୍ତି ପ୍ରିୟ ସିଂହ ଏବେ ମଣିଷ ଖିଆ ସିଂହ ହୋଇଯାଇଛି । ନୂଆ ରୂପରେ ଏହା ଅତି ଉଗ୍ର ଓ ମାରାତ୍ମକ ଦୃଶ୍ୟମାନ ହେଉଛି। ଏହାପରେ ଦୁଇ ଜଣ ଓକିଲ ଆଲଦନିଶ ରେନ ଏବଂ ରମେଶ କୁମାରଙ୍କ ପକ୍ଷରୁ ଏହି ମାମଲାରେ ଏକ ପିଟିସନ ଦାଖଲ କରାଯାଇଥିଲା। ଆବେଦନକାରୀମାନେ ଦାବି କରିଥିଲେ ଯେ ଏହି ନୂତନ ପ୍ରତିମୂର୍ତ୍ତି ଜାତୀୟ ପ୍ରତୀକର ଡିଜାଇନ୍ ବିରୁଦ୍ଧ ହୋଇଥିବାବେଳେ ଏହି ପ୍ରତୀକରେ ସିଂହମାନେ ନିଷ୍ଠୁର ଦେଖାଯାଉଛନ୍ତି | ସିଂହମାନଙ୍କର ପାଟି ଖୋଲାଥିବାବେଳେ ଦାନ୍ତ ଦୃଶ୍ୟମାନ ହେଉଛି। ଯେତେବେଳେ କି, ସାରନାଥରେ ମୂର୍ତ୍ତିର ସିଂହମାନେ ଶାନ୍ତ ଦେଖାଯାନ୍ତି | ତେବେ ଜଷ୍ଟିସ ଏମଆର ଶାହା ଏବଂ ଜଷ୍ଟିସ କୃଷ୍ଣ ମୁରାରୀଙ୍କ ଖଣ୍ଡପୀଠ ଏହି ଆବେଦନକୁ ଖାରଜ କରିଦେଇଛନ୍ତି ।