ତାମିଲନାଡୁରେ ଭୂସ୍ଖଳନ,୭ ମୃତ୍ୟୁ…..

ରିପୋର୍ଟ କାର୍ଡ / ନୂଆଦିଲ୍ଲୀ

ତାମିଲନାଡୁରେ ପ୍ରବଳ ବର୍ଷା ଯୋଗୁ ଭୂସ୍ଖଳନ ଘଟି ୭ ଜଣଙ୍କ ମୃତ୍ୟୁ ହୋଇଛି। ତିରୁଭାନ୍ନାମାଲାଇ ଅଞ୍ଚଳର ଭିଓସି ନଗରରେ ରବିବାର ଅପରାହ୍ନରେ ଏହି ଦୁଃଖଦ ଘଟଣା ଘଟିଛି। ମୃତକଙ୍କ ମଧ୍ୟରେ ୫ ଶିଶୁ ରହିଛନ୍ତି। ଭୂସ୍ଖଳନରେ ପ୍ରାଣ ହରାଇଥିବା ସମସ୍ତ ବ୍ୟକ୍ତି ଗୋଟିଏ ପରିବାରର ବୋଲି ଜଣାପଡ଼ିଛି। ବାତ୍ୟା ଫେଙ୍ଗାଲ ପ୍ରଭାବରେ ତାମିଲନାଡୁର ବିଭିନ୍ନ ଅଞ୍ଚଳରେ ପ୍ରବଳ ବର୍ଷା ଲାଗି ରହିଛି। ବର୍ଷା ଯୋଗୁ ତିରୁଭାନ୍ନାମାଲାଇ ଅଞ୍ଚଳରେ ରବିବାର ଅପରାହ୍ନରେ ଭୂସ୍ଖଳନ ଘଟିଛି। ପାହାଡ଼ିଆ ଅଞ୍ଚଳରୁ ମାଟି ଅତଡ଼ା ଏବଂ ପଥର ଖଣ୍ଡ ଖସିଆସିବା ଫଳରେ ପାହାଡ଼ ପାଦଦେଶରେ ଥିବା ଏକ ଘର ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି। ଘର ଭିତରେ ଥିବା ୭ ଜଣଙ୍କର ପ୍ରାଣହାନୀ ଘଟିଥିବା ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ଉକ୍ତ ଘରଟି ରାଜକୁମାର ଏବଂ ମୀନା ନାମକ ଏକ ଦମ୍ପତିଙ୍କର। ଘଟଣା ପରେ ପୋଲିସ ରାଜକୁମାରଙ୍କ ନମ୍ବରକୁ ଫୋନ ଯୋଗେ ଯୋଗାଯୋଗ କରିବାକୁ ଉଦ୍ୟମ କରିଥିଲା। କିନ୍ତୁ କେହି ଫୋନ ଉଠାଇ ନ ଥିଲେ। ସମସ୍ତେ ମାଟିତଳେ ଦବି ରହିଥିବା ପୋଲିସ ସନ୍ଦେହ କରିବା ସହିତ ତୁରନ୍ତ ସେଠାରେ ଉଦ୍ଧାର କାର୍ଯ୍ୟ କରାଯାଇଥିଲା।