ଆଜି ଗୁରୁ ଦିବସ…..

ରିପୋର୍ଟ କାର୍ଡ / ଭୁବନେଶ୍ୱର

‘ଗୁରୁ ବ୍ରହ୍ମା, ଗୁରୁ ବିଷ୍ଣୁ, ଗୁରୁ ଦେବୋ ମହେଶ୍ବର,
ଗୁରୁ ସାକ୍ଷାତ୍ ପରଂବ୍ରହ୍ମ, ତସ୍ମୈ ଶ୍ରୀ ଗୁରବେ ନମଃ’

ଆଜି ହେଉଛି ଗୁରୁ ଦିବସ ଅର୍ଥାତ ‘ଟିଚର୍ସ ଡେ’ | ଯିଏ ଆମକୁ ଜୀବନରେ ଅନ୍ଧକାରକୁ ଦୂର କରି ଆଲୋକ ଦେଖାଇଥାନ୍ତି | ସେ ହେଉଛନ୍ତି ପ୍ରକୃତ ଗୁରୁ | ଗୁରୁଙ୍କ ଆଶୀର୍ବାଦରେ ଛାତ୍ରଛାତ୍ରୀ ଅଶେଷ ଜ୍ଞାନ ଓ ସମ୍ମାନର ଅଧିକାରୀ ହୋଇପାରିବେ | ଗୁରୁ ଙ୍କୁ ସ୍ୱୟଂ ବ୍ରହ୍ମା , ବିଷ୍ଣୁ ଏବଂ ମହେଶ୍ଵରଃ ସାକ୍ଷାତ୍ ପରଂବ୍ରହ୍ମ | ଆମର ପ୍ରଥମ ଗୁରୁ ହେଉଛନ୍ତି ପିତା ମାତା | ଏମାନଙ୍କ ପରେ ଆମ ଜୀବନରେ ଆସିଥାନ୍ତି ଶିକ୍ଷକ ବା ଗୁରୁ | ଆମକୁ କଷଟୀପଥରରେ କଷି ଆମ ଭବିଷ୍ୟତ ଜୀବନ ଯାତ୍ରାକୁ ସରଳ ଓ ଆଲୋକିତ କରିଥାନ୍ତି | ଗୁରୁ ଶିଷ୍ୟର ପରମ୍ପରା କାଇଁ ଅନାଦି କାଳରୁ ରହିଆସିଛି | ଗୁଗୁ ଙ୍କ ବିନା ଶିକ୍ଷାର ମାନେ ନାହିଁ | ଗୀତାରେ ମଧ୍ୟ ଗୁରୁଙ୍କ ଭୂମିକା ବର୍ଣ୍ଣନା ହୋଇଛି ଶ୍ରୀକୃଷ୍ଣ ଅର୍ଜୁନଙ୍କୁ କହିଥିଲେ -ଗୁରୁ ନଖାଟି ଅର୍ଜୁନ କାହୁଁ ପାଇବ ସଦାଜ୍ଞାନ | ପରମ୍ପରାରେ ଗୁରୁଙ୍କୁ ସର୍ବୋଚ୍ଚ ଆସନରେ ରଖାଯାଇଛି। ରାମାୟଣ ପୌରାଣିକ ଗାଥାରେ ମହର୍ଷି ବିଶ୍ବାମିତ୍ରଙ୍କ ଚରିତ୍ର, ମହାଭାରତରେ ଗୁରୁ ଦ୍ରୋଣାଚାର୍ଯ୍ୟଙ୍କ ଭୂମିକା ଯୁଗେ ଯୁଗେ ପୂଜନୀୟ। ସର୍ବଭାରତୀୟସ୍ତରରେ ସେପ୍ଟେମ୍ବର ୫ତାରିଖକୁ ଗୁରୁଦିବସ ଭାବେ ପାଳନ କରାଯାଉଛି। ଭାରତର ପ୍ରଥମ ଉପ-ରାଷ୍ଟ୍ରପତି ଓ ଦ୍ବିତୀୟ ରାଷ୍ଟ୍ରପତି ଡ. ସର୍ବପଲ୍ଲୀ ରାଧାକୃଷ୍ଣନଙ୍କ ଜନ୍ମଦିନ କୁ ଦେଶରେ ‘ଗୁରୁ ଦିବସ’ ଭାବେ ପାଳନ କରାଯାଏ। ତାମିଲନାଡ଼ୁର ତିରୁଟ୍ଟନୀଠାରେ ୧୮୮୮ ସେପ୍ଟେମ୍ବର ୫ରେ ତାଙ୍କର ଜନ୍ମ। ମେଧାବୀ ଛାତ୍ର ରାଧାକୃଷ୍ଣନ୍ ବିଦ୍ୟାଳୟରେ ପଢ଼ିବା ସମୟରେ ବହୁଥର ବୃତ୍ତି ପାଇଥିଲେ। ଦର୍ଶନଶାସ୍ତ୍ରରେ​‌ ପାଠପଢ଼ା ସରିବା ପରେ ୧୯୦୯ରେ ମାଡ୍ରାସ୍ ପ୍ରେସିଡେନ୍ସି କଲେଜର ଦର୍ଶନଶାସ୍ତ୍ର ବିଭାଗରେ ସେ ନିଯୁକ୍ତି ପାଇଲେ। ୧୯୧୮ରେ ମହୀଶୂର ବିଶ୍ବବିଦ୍ୟାଳୟରେ ଡ. ରାଧାକୃଷ୍ଣନ୍ ପ୍ରଫେସର୍ ଭାବେ କାମ ଆରମ୍ଭ କଲେ। ଦକ୍ଷ ଗୁରୁ ରାଧାକୃଷ୍ଣନ୍‌‌ଙ୍କ ପାରଙ୍ଗମତା ସେତେବେଳେ ବ୍ରିଟିଶ୍ ଅଧିକାରୀଙ୍କୁ ମଧ୍ୟ ଅଜଣା ନଥିଲା। ୧୯୨୬ ସେପ୍ଟେମ୍ବରରେ ସେ କଲକାତା ବିଶ୍ବବିଦ୍ୟାଳୟରେ ପ୍ରଫେସର ଭାବେ ଦାୟିତ୍ବ ତୁଲାଉଥାନ୍ତି, ସେହି ସମୟରେ ହାର୍ଭାର୍ଡ ବିଶ୍ବବିଦ୍ୟାଳୟରେ ସେ କଲକାତା ବିଶ୍ବବିଦ୍ୟାଳୟ ତରଫରୁ ପ୍ରତିନିଧିତ୍ବ କଲେ। ୧୯୨୯ରେ ପୁଣିଥରେ ଡ.ରାଧାକୃଷ୍ଣନ୍‌ଙ୍କୁ ଅକ୍ସଫୋର୍ଡସ୍ଥିତ ‘ମାଞ୍ଚେଷ୍ଟର ମହାବିଦ୍ୟାଳୟ’ରେ ଜୀବନର ଆଦର୍ଶ ସମ୍ପର୍କରେ କହିବାକୁ ସୁଯୋଗ ମିଳିଲା। ୧୯୪୭ରେ ଦେଶ ସ୍ବାଧୀନ ହେବା ପରେ ସେ ୟୁନେସ୍କୋରେ ଭାରତର ରାଷ୍ଟ୍ରଦୂତ ରୂପେ କାର୍ଯ୍ୟ କରିଥିଲେ। ଅସାଧାରଣ ପ୍ରତିଭାର ଅଧିକାରୀ ଡ.ରାଧାକୃଷ୍ଣନ୍‌ ରାଷ୍ଟ୍ରପତି ଘୋଷିତ ହେବା ପରେ ତାଙ୍କର କେତେଜଣ ବନ୍ଧୁ ଓ ଛାତ୍ର ସେହି ବର୍ଷ ଜନ୍ମଦିନ ପାଳନ କରିବାକୁ ତାଙ୍କୁ ଅନୁରୋଧ କରିଥିଲେ। ବିନମ୍ରତାର ସହ ମନା କରି ସେ ପରାମର୍ଶ ଦେଇଥିଲେ ସେପ୍ଟେମ୍ବର ୫ତାରିଖକୁ ‘ଗୁରୁ ଦିବସ’ ଭାବେ ପାଳନ କରାଗଲେ, ସେ ଖୁସି ହେବେ। ସେବେଠାରୁ ଡ.ରାଧାକୃଷ୍ଣନ୍‌ଙ୍କ ଜନ୍ମଦିନକୁ ‘ଗୁରୁ ଦିବସ’ ରୂପେ ସାରା ଦେଶ ପାଳନ କରୁଅଛି |