ପଶ୍ଚିମବଙ୍ଗରେ ୪ବିଧାନସଭା ଆସନରେ TMC ବିଜୟୀ, ଅମାନତ ହରାଇଲା ବିଜେପି……

ରିପୋର୍ଟ କାର୍ଡ / ନୂଆଦିଲ୍ଲୀ

ପଶ୍ଚିମବଙ୍ଗରେ ପୁଣି ଦିଦି କମାଲ କରିଛନ୍ତି। ନିକଟରେ ଶେଷ ହୋଇଥିବା ୪ଟି ବିଧାନସଭା ନିର୍ବାଚନର ଫଳାଫଳ ମଙ୍ଗଳବାର ପ୍ରକାଶ ପାଇଛି । ଟିଏମସି ୪ଟି ଆସନକୁ ମୂଳପୋଛ କରିଦେଇଥିବା ବେଳେ ବିଜେପି ୩ଟି ଆସନରେ ଅମାନତ ହରାଇଛି । ଏହି ବିଜୟ ପରେ ଦଳର ସୁପ୍ରିମୋ ତଥା ମୁଖ୍ୟମନ୍ତ୍ରୀ ମମତା ବାନାର୍ଜୀ ଜନତାଙ୍କୁ ଧନ୍ୟବାଦ ଜଣାଇଛନ୍ତି । ଆଗକୁ ବିଜେପିର ଦୁର୍ନୀତି ବିରୋଧରେ ତାଙ୍କର ସଂଗ୍ରାମ ଜାରି ରହିବ ବୋଲି ସେ କହିଛନ୍ତି । ଦିନହାତା, ଶାନ୍ତିପୁର, ଗୋସାବା ଓ ଖରଦାହ ଆସନଗୁଡ଼ିକରେ ବିଜେପିର ପ୍ରାର୍ଥୀମାନେ ଚିତପଟାଙ୍ଗ ମାରିଛନ୍ତି । ଗତ ମାସ ୩୦ ତାରିଖରେ ଏହି ଆସନଗୁଡ଼ିକରେ ଉପନିର୍ବାଚନ ହୋଇଥିଲା । ଦେଶରେ ମୋଟ ୨୯ଟି ବିଧାନସଭା ଓ ୩ଟି ଲୋକସଭା ଆସନରେ ଭୋଟ ହୋଇଥିଲା । ତେବେ ୩ଟି ଆସନରେ ବିଜେପି ପ୍ରାର୍ଥୀମାନେ ନିଜର ଅମାନତ ହରାଇଛନ୍ତି । ଏହି ବିଜୟ ଫଳରେ ମୁଖ୍ୟମନ୍ତ୍ରୀ ଭାବେ ମମତାଙ୍କ ସ୍ଥିତି ଅଧିକ ସୁଦୃଢ଼ ହୋଇପାରିଛି । ବଙ୍ଗ ଉପନିର୍ବାଚନରେ ତୃଣମୂଳ କଂଗ୍ରେସକୁ ୭୫ ପ୍ରତିଶତ ଭୋଟ ମିଳିଥିବା ବେଳେ ବିଜେପିକୁ ମାତ୍ର ୧୪.୫ ପ୍ରତିଶତ ଭୋଟ ମିଳିଥିବା ଜଣାପଡ଼ିଛି । ତେବେ ପୂର୍ବରୁ ବିଧାନସଭା ନିର୍ବାଚନରେ ଟିଏମସି ସଂଖ୍ୟାଗରିଷ୍ଠ ହାସଲ କରିଥିଲା । ବର୍ତ୍ତମାନ ପୁଣି ଉପନିର୍ବାଚନରେ ବାଜିମାତ କରି ଦିଦି ନିଜର ଲୋକପ୍ରିୟତାର ପ୍ରମାଣ ଦେଇଛନ୍ତି ।