ସାଧାରଣତନ୍ତ୍ର ଦିବସ ଉପଲକ୍ଷେ ରାଷ୍ଟ୍ରପତିଙ୍କ ଉଦ୍‌ବୋଧନ…..

ରିପୋର୍ଟ କାର୍ଡ / ନୂଆଦିଲ୍ଲୀ

୭୭ତମ ସାଧାରଣତନ୍ତ୍ର ଦିବସ ଅବ୍ୟବହିତ ପୂର୍ବରୁ ରବିବାର ସନ୍ଧ୍ୟାରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଦେଶବାସୀଙ୍କୁ ସମ୍ବୋଧନ କରିଛନ୍ତି। ଏହି ଜାତୀୟ ପର୍ବ ପାଇଁ ଦେଶ ଓ ବିଦେଶରେ ରହୁଥିବା ସମସ୍ତ ଭାରତୀୟଙ୍କୁ ରାଷ୍ଟ୍ରପତି ଅଭିନନ୍ଦନ ଜଣାଇଛନ୍ତି। ରାଷ୍ଟ୍ରପତି କହିଛନ୍ତି ଯେ ଗଣତନ୍ତ୍ର ଦିବସର ପବିତ୍ର ଅବସର ଆମକୁ ଆମ ଅତୀତ, ବର୍ତ୍ତମାନ ଏବଂ ଭବିଷ୍ୟତରେ ଦେଶର ଭାଗ୍ୟ ଓ ପରିସ୍ଥିତି ଉପରେ ଅବଲୋକନ କରିବାର ଏକ ଅବସର ଆଣିଦେଇଥାଏ। ୧୯୪୭ ମସିହା ଅଗଷ୍ଟ ୧୫ ତାରିଖରେ ଆମ ଦେଶ ସ୍ୱାଧୀନ ହୋଇଥିଲା। ୧୯୫୦ ମସିହା ଜାନୁଆରୀ ୨୬ ତାରିଖରୁ ଆମେ ଆମ ଗଣତନ୍ତ୍ରର ସାମ୍ବିଧାନିକ ଆଦର୍ଶ ଦିଗରେ ଆଗକୁ ବଢୁଛେ। ଏହି ଦିନ ଆମ ସମ୍ବିଧାନ ପୂର୍ଣ୍ଣ ଭାବେ କାର୍ଯ୍ୟକାରୀ ହୋଇଥିଲା। ନ୍ୟାୟ, ସ୍ୱାଧୀନତା, ସମାନତା ଏବଂ ଭ୍ରାତୃତ୍ୱର ଆଦର୍ଶ ଆମ ସମ୍ବିଧାନର ପରିଭାଷା। ସମ୍ବିଧାନ ପ୍ରଣେତାମାନେ ଜାତୀୟତା ଏବଂ ଏକତାର ଭାବନା ସହ ସାମ୍ବିଧାନିକ ବ୍ୟବସ୍ଥାକୁ ଏକ ଦୃଢ଼ ଭିତ୍ତିଭୂମି ପ୍ରଦାନ କରିଛନ୍ତି।ରାଷ୍ଟ୍ରପତି କହିଛନ୍ତି ଯେ ପରିବେଶ ସଂରକ୍ଷଣ ଆଜି ଅତ୍ୟନ୍ତ ମହତ୍ତ୍ୱପୂର୍ଣ୍ଣ ପ୍ରାଥମିକତା ସାଜିଛି। ପରିବେଶ ସହ ଜଡିତ ଅନେକ କ୍ଷେତ୍ରରେ ଭାରତ ବିଶ୍ୱ ସମୁଦାୟକୁ ମାର୍ଗଦର୍ଶନ କରିଛି। ପ୍ରକୃତି ସହ ସମନ୍ୱିତ ଜୀବନଶୈଳୀ ଭାରତର ସାଂସ୍କୃତିକ ପରମ୍ପରାର ଅଂଶବିଶେଷ। ଆମ ପରମ୍ପରାରେ ସମଗ୍ର ବିଶ୍ବରେ ଶାନ୍ତି ବଜାୟ ରଖିବା ପାଇଁ ପ୍ରାର୍ଥନା କରାଯାଏ। ସାରା ବିଶ୍ୱରେ ଶାନ୍ତି ସ୍ଥାପିତ ହେବା ଫଳରେ ମାନବିକତାର ଭବିଷ୍ୟତ ସୁରକ୍ଷିତ ହୋଇପାରିବ। ବିଶ୍ୱର ଅନେକ କ୍ଷେତ୍ରରେ ବ୍ୟାପ୍ତ ଅଶାନ୍ତିର ବାତାବରଣ ମଧ୍ୟରେ ଭାରତ ପକ୍ଷରୁ ବିଶ୍ୱ ଶାନ୍ତିର ସନ୍ଦେଶ ପ୍ରସାରିତ କରାଯାଉଛି। ତେଣୁ ସମଗ୍ର ବିଶ୍ବ ଏବେ ଯୁଦ୍ଧରତ ଥିବାବେଳେ ଭାରତ ଶାନ୍ତିର ରାସ୍ତାକୁ ଆପଣାଇ ଆଗକୁ ବଢୁଛି। ରାଷ୍ଟ୍ରପତି କହିଛନ୍ତି ଯେ ଭାରତ ବିଶ୍ୱର ସବୁଠାରୁ ଦ୍ରୁତଗତିରେ ଆଗେଇ ଚାଲିଥିବା ଅର୍ଥବ୍ୟବସ୍ଥା। ବିଶ୍ୱସ୍ତରରେ ଅନିଶ୍ଚିତତା ସତ୍ତ୍ୱେ ଭାରତ ନିରନ୍ତର ଭାବେ ଆର୍ଥିକ ବିକାଶ ପଥରେ ଆଗେଇ ଚାଲିଛି। ଭାରତ ଆଗାମୀ ଦିନରେ ବିଶ୍ୱର ତୃତୀୟ ସର୍ବବୃହତ ଅର୍ଥବ୍ୟବସ୍ଥା ହେବାକୁ ଯାଉଛି। ବିଶ୍ୱସ୍ତରୀୟ ଭିତ୍ତିଭୂମିର ନିର୍ମାଣରେ ନିବେଶ ସହ ଆମେ ନିଜ ଆର୍ଥିକ ବ୍ୟବସ୍ଥା ତଥା ଉଚ୍ଚସ୍ତରର ପୁନଃନିର୍ମାଣ କରିବାରେ ସକ୍ଷମ ହୋଇଛେ। ଆର୍ଥିକ ନିୟତିର ନିର୍ମାଣଯାତ୍ରାରେ ଆତ୍ମନିର୍ଭରତା ଏବଂ ସ୍ୱଦେଶୀ ଆମର ମୂଳମନ୍ତ୍ର। ଗତ ଦଶନ୍ଧିରେ ଜାତୀୟ ଲକ୍ଷ୍ୟକୁ ଜନଭାଗୀଦାରି ମାଧ୍ୟମରେ ପ୍ରାପ୍ତ କରିବାର ପ୍ରୟାସ କରାଯାଇଛି। ଜାତୀୟ ଅଭିଯାନଗୁଡ଼ିକୁ ଜନଆନ୍ଦୋଳନରେ ପରିଣତ କରାଯାଇଛି । ଗତବର୍ଷ ଅପରେସନ୍ ସିନ୍ଦୂରରେ ପାକିସ୍ତାନରେ ଥିବା ଆତଙ୍କବାଦୀ ଆଡ୍ଡାସ୍ଥଳଗୁଡ଼ିକୁ ଆମ ସେନା ଧ୍ୱଂସ କରିଥିଲା। ଏଥିରେ ବହୁ ପାକିସ୍ତାନୀ ଆତଙ୍କବାଦୀ ପ୍ରାଣ ହରାଇଥିଲେ। ସୁରକ୍ଷା କ୍ଷେତ୍ରରେ ଆମ ଆତ୍ମନିର୍ଭରଶୀଳତା ଲାଗି ଅପରେସନ ସିନ୍ଦୂରର ଐତିହାସିକ ସଫଳତାକୁ ଶକ୍ତି ମିଳିଥିଲା।