ବିଳମ୍ବରେ ଆସିବ ମୌସୁମୀ…..

ରିପୋର୍ଟ କାର୍ଡ / ଭୁବନେଶ୍ୱର

ଆସନ୍ତା ୨ରୁ ୩ ଦିନ ମଧ୍ୟରେ ଦକ୍ଷିଣ-ପଶ୍ଚିମ ମୌସୁମୀ ବାୟୁ ଦକ୍ଷିଣ-ପଶ୍ଚିମ ଏବଂ ଦକ୍ଷିଣ-ପୂର୍ବ ଆରବସାଗରର କିଛି ଅଂଶ, ଲାକ୍ଷାଦ୍ବୀପ ଅଞ୍ଚଳ, ଦକ୍ଷିଣ-ପଶ୍ଚିମ, ପୂର୍ବ-କେନ୍ଦ୍ରୀୟ, ପଶ୍ଚିମ-କେନ୍ଦ୍ରୀୟ ବଙ୍ଗୋପସାଗର, ଦକ୍ଷିଣ-ପୂର୍ବ ଓ ଉତ୍ତର-ପୂର୍ବ ବଙ୍ଗୋପସାଗରର କିଛି ଅଞ୍ଚଳରେ ଅଗ୍ରସର ହେବାକୁ ପାଗ ଅନୁକୂଳ ରହିଛି। ଏନେଇ ଭାରତୀୟ ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି। ଅନ୍ୟପକ୍ଷରେ ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ କହିଛନ୍ତି, ବିଶ୍ବସ୍ତରୀୟ ଏନ୍‌ସେମ୍ବଲ୍ ମଡେଲ୍ ଏବଂ ବର୍ତ୍ତମାନର ପାଣିପାଗ ପର୍ଯ୍ୟବେକ୍ଷଣରୁ ଜଣାପଡ଼େ ଆସନ୍ତା ୩୦ରୁ ଜୁନ୍ ୩ ମଧ୍ୟରେ କେରଳମରେ ଦକ୍ଷିଣ-ପଶ୍ଚିମ ମୌସୁମି ବାୟୁର ଆଗମନ ହୋଇପାରେ। ଯଦି ବାୟୁମଣ୍ଡଳୀୟ ଗଠନର ଏହି ମନ୍ଥର ପ୍ରକ୍ରିୟା ଜାରି ରହେ ଏବଂ ବାୟୁ ପ୍ରବାହ ଉପଯୁକ୍ତ ଭାବେ ସଙ୍ଗଠିତ ନହୁଏ ତେବେ ମୌସୁମି ଆଗମନ ଆହୁରି ୨ରୁ ୩ଦିନ ଘୁଞ୍ଚିଯାଇପାରେ। ଏହି ବିଳମ୍ବର ଅର୍ଥ ଏହା ନୁହେଁ ଯେ ମୌସୁମି ଦୁର୍ବଳ ହୋଇଯାଇଛି। ନିରନ୍ତର ବିଷୁବରେଖା ଅତିକ୍ରମ କରୁଥିବା ଦକ୍ଷିଣ-ପଶ୍ଚିମ ବାୟୁ, ପଶ୍ଚିମ ଉପକୂଳରେ ସକ୍ରିୟ ଅଫ୍-ସୋର୍ ଟ୍ରଫ୍, କେରଳ-ଲାକ୍ଷାଦ୍ୱୀପରେ ବ୍ୟାପକ ବର୍ଷା, ଘନ ମେଘମାଳା ଏବଂ ଦିନର କମ୍ ତାପମାତ୍ରା ରହିବା ମୌସୁମି ପାଇଁ ଏକ ଶକ୍ତିଶାଳୀ ଅନୁକୂଳ ସ୍ଥିତିକୁ ଦର୍ଶାଉଛି। ଏକ ସମ୍ପୂର୍ଣ୍ଣ ବିକଶିତ ମୌସୁମି ଗଠନ ନ ହୋଇ ବର୍ତ୍ତମାନ କେରଳମରେ ସ୍ଥାନେ ସ୍ଥାନେ ପ୍ରବଳ ବର୍ଷା ହେଉଛି। ଓଡ଼ିଶା ପାଇଁ ଏହା ସୂଚାଉଛି ଯେ, ଉପକୂଳବର୍ତ୍ତୀ ଜିଲାଗୁଡ଼ିକରେ ବୃଦ୍ଧି ପାଉଥିବା ଆର୍ଦ୍ରତା, ଗରମ ରାତି ଏବଂ ବଜ୍ରପାତ ସହ ବର୍ଷାର ପରିମାଣ ବୃଦ୍ଧି ପାଇବାର ସମ୍ଭାବନା ରହିଛି। ପଶ୍ଚିମ ଓଡ଼ିଶାରେ ପ୍ରବଳ ଗ୍ରୀଷ୍ମ ପ୍ରବାହ ଜାରି ରହିପାରେ। ସମୁଦ୍ରରୁ ଆସୁଥିବା ଉପରିସ୍ଥ ଆର୍ଦ୍ରତା ଏବଂ ଆଭ୍ୟନ୍ତରୀଣ ଅଞ୍ଚଳର ଅତ୍ୟଧିକ ଉତ୍ତାପର ମିଶ୍ରଣ ଯୋଗୁଁ ଜୁନ ଆରମ୍ଭରେ ଓଡ଼ିଶାରେ ଏକ ସକ୍ରିୟ କାଳବୈଶାଖୀ ପର୍ଯ୍ୟାୟ ଦେଖିବାକୁ ମିଳିବାର ସମ୍ଭାବନା ରହିଛି। ବଙ୍ଗୋପସାଗରୀୟ ବାୟୁ ପ୍ରବାହ ବର୍ତ୍ତମାନର ଆଶା ଅପେକ୍ଷା ଅଧିକ ଦ୍ରୁତ ଗତିରେ ଶକ୍ତିଶାଳୀ ନ ହେଲେ ଓଡ଼ିଶାରେ ସମ୍ପୂର୍ଣ୍ଣ ଭାବେ ସ୍ଥିର ମୌସୁମି ପରିସ୍ଥିତି ଜୁନ ଦ୍ୱିତୀୟ ସପ୍ତାହ ମଧ୍ୟରେ ଅନୁଭୂତ ହେବା ନେଇ ଅଧିକ ସମ୍ଭାବନା ଦେଖାଯାଉଛି।