ଅତ୍ୟାଧୁନିକ ସାଟେଲାଇଟ୍ GSAT-1ଉତକ୍ଷେପଣ ବିଫଳ,ଅଧାରେ ଅଟକିଲା EOS-୦୩….

ରିପୋର୍ଟ କାର୍ଡ / ନୂଆଦିଲ୍ଲୀ

ଅତ୍ୟାଧୁନିକ ସାଟେଲାଇଟ୍ ଜିସାଟ୍ -୧ର ଉତକ୍ଷେପଣ ବିଫଳ ହୋଇଛି । ଅଧାରେ ଅଟକିଲା EOS-୦୩ | ଜିସାଟ୍ -୧କୁ ସଫଳ ଉତକ୍ଷେପଣ କରି ଇତିହାସ ରଚିବାକୁ ଇସ୍ରୋ ଯେଉଁ ଳକ୍ଷ୍ୟରେ ରଖିଥିଲା | ଗୁରୁବାର ସେଥିରେ ବିଫଳ ହୋଇଛି । ଶ୍ରୀହରିକୋଟ୍ଟାରୁ ସକାଳ ୫ଟା ୪୩ ସମୟରେ ଏହାର ଉତକ୍ଷେପଣ କରାଯାଇଥିଲା । କିନ୍ତୁ ମିସନ୍ ସମୟର ୧୦ ସେକେଣ୍ଡ ପୂର୍ବରୁ ଏହା ଖରାପ ହୋଇଯାଇଥିଲା । ଇସ୍ରୋ ଏହି ଉପଗ୍ରହକୁ ୫ଟା ୪୩ରେ ସଫଳତା ପୂର୍ବକ ଉତକ୍ଷେପଣ କରିଥିଲା । ସବୁ କାମ ନିଜର ନିର୍ଦ୍ଧାରିତ ସମୟ ମଧ୍ୟରେ ହୋଇଥିଲା । ପୂରା ଯାତ୍ରା ୧୮.୩୯ ମିନିଟର ଥିଲା । କିନ୍ତୁ ଶେଷ ସମୟରେ ଅଲଗା ହେବା ପୂର୍ବରୁ କ୍ରାୟୋଜେନିକ ଇଂଜିନରେ କିଛି ଯାନ୍ତ୍ରିକ ତ୍ରୁଟି ଦେଖାଯାଇଥିଲା । ଏହି କାରଣରୁ ଇସ୍ରୋକୁ ତଥ୍ୟ ମିଳିବା ବନ୍ଦ ହୋଇଯାଇଥିଲା । ଲାଇଫ ପ୍ରସାରଣ ଦେଖିବାରେ ବୈଜ୍ଞାନିକମାନେ ଅସୁବିଧାର ସମ୍ମୁଖୀନ ହୋଇଥିଲେ । ଏହା ପରେ ଘୋଷଣା କରାଗଲା ଯେ, EOS-03 ମିଶନ ଆଂଶିକ ଭାବେ ବିଫଳ ହୋଇଛି । ଇଓଏସ-୦୩ ଏକ ଅତ୍ୟାଧୁନିକ ଭୂପୃଷ୍ଠ ପର୍ଯ୍ୟବେକ୍ଷଣକାରୀ କୃତ୍ରିମ ଉପଗ୍ରହ । ଏହାକୁ ଜିଏସଏଲଭି-୧୦ ଦ୍ୱାରା ଜିଓସିଙ୍କ୍ରୋନସ ଟ୍ରାନ୍ସଫର କକ୍ଷ ପଥରେ ଅବସ୍ଥାପିତ କରାଯିବାକୁ ଲକ୍ଷ୍ୟ ରଖାଯାଇଥିଲା । ପରବର୍ତ୍ତୀ ସମୟରେ ଏହି କୃତ୍ରିମ ଉପଗ୍ରହ ଏହା ଦେହରେ ଖଞ୍ଜାଯାଇଥିବା ପ୍ରପଲସନ ବ୍ୟବସ୍ଥାକୁ ଉପଯୋଗ କରି ଚୂଡାନ୍ତ ଭୂସ୍ଥିର କକ୍ଷ ପଥରେ ପହଞ୍ଚିଥାନ୍ତା । କିନ୍ତୁ ଯାନ୍ତ୍ରିକ ତ୍ରୁଟି ଯୋଗୁ ଏହା ଫେଲ୍ ମାରିଛି । ଏହି ଉପଗ୍ରହ ଅଭିଯାନ ସଫଳ ହୋଇଥିଲେ ତାହା ଭୂପୃଷ୍ଠର ବିସ୍ତୀର୍ଣ୍ଣ ଅଞ୍ଚଳ ସମ୍ପର୍କରେ ନିୟମିତ ବ୍ୟବଧାନରେ ବାସ୍ତବ ସମୟ ଭିତ୍ତିକ ଫଟୋଚିତ୍ର ପଠାଇଥାନ୍ତା । ତାହାକୁ ନେଇ ପ୍ରାକୃତିକ ବିପର୍ଯ୍ୟୟ, ଝଡବାତ୍ୟା ସମ୍ପର୍କରେ ନିରୀକ୍ଷଣ, ବାଦଲ ଫାଟିବା ଏବଂ କୁଆପଥର ବର୍ଷା ଆଦି ସମ୍ପର୍କରେ ସଠିକ ତଥ୍ୟ ସହିତ ଆଗୁଆ ସତର୍କ ସୂଚନା ମିଳିପାରିଥାନ୍ତା । ଏହା ପୂର୍ବରୁ ୨୦୨୦ ନଭେମ୍ବରରେ ଭୂପୃଷ୍ଠ ପର୍ଯ୍ୟବେକ୍ଷଣକାରୀ କୃତ୍ରିମ ଉପଗ୍ରହ ଇଏସଏସ-୦୧କୁ ‘ପିଏସଏଲଭି-ସି୪୯’ ସହାୟତାରେ ସଫଳତାର ସହିତ ମହାକାଶକୁ ପଠାଯାଇଥିଲା। ଏହି ନୂତନ ଉପଗ୍ରହ କୃଷି, ଜଙ୍ଗଲ ଓ ବିପର୍ଯ୍ୟୟ ପରିଚାଳନା ଆଦି କ୍ଷେତ୍ରରେ ବିଶେଷ ସହାୟକ ହୋଇଥାନ୍ତା ବୋଲି ଇସ୍ରୋ ପକ୍ଷରୁ ପୂର୍ବରୁ ସୂଚନା ମିଳିଥିଲା।