୩ରେ ପୁରୁଷ କମିଶନ ଗଠନ ଶୁଣାଣି!….

ରିପୋର୍ଟ କାର୍ଡ / ନୂଆଦିଲ୍ଲୀ

ଘରୋଇ ହିଂସା ଯୋଗୁ ପୁରୁଷମାନଙ୍କ ଆତ୍ମହତ୍ୟା ସଂଖ୍ୟା ବଢ଼ିବାରେ ଲାଗିଛି। ଏହି ସମସ୍ୟାକୁ ରୋକିବା ଓ ନିର୍ଯାତନାରୁ ପୁରୁଷମାନଙ୍କୁ ସୁରକ୍ଷା ଯୋଗାଇ ଦେବା ପାଇଁ ଜାତୀୟ ପୁରୁଷ କମିଶନ ଗଠନ ଦାବିରେ ହୋଇଥିବା ଜନସ୍ୱାର୍ଥ ମାମଲାର ଶୁଣାଣି କରିବେ ସୁପ୍ରିମକୋର୍ଟ। ଆସନ୍ତା ୩ ତାରିଖ ଅର୍ଥାତ ସୋମବାର ସର୍ବୋଚ୍ଚ ଅଦାଲତରେ ଏହାର ଶୁଣାଣି ହେବ। ସୁପ୍ରିମକୋର୍ଟର ୱେବସାଇଟ ଅନୁଯାୟୀ, ଜଷ୍ଟିସ ସୂର୍ଯ୍ୟକାନ୍ତ ଓ ଜଷ୍ଟିସ ଦୀପକଙ୍କର ଦତ୍ତାଙ୍କ ଖଣ୍ଡପୀଠ ଏ ସଂକ୍ରାନ୍ତ ପିଏଆଇଏଲର ଶୁଣାଣି କରିବେ। ଆଇନଜୀବୀ ମହେଶ କୁମାର ତିୱାରୀ ଦାଖଲ କରିଥିବା ପିଆଇଏଲଏଲରେ କହିଛନ୍ତି ଯେ ୨୦୨୧ର ଏନସିଆରବି ତଥ୍ୟ ଅନୁଯାୟୀ, ସମଗ୍ର ଦେଶରେ ମୋଟ ୧,୬୪,୦୩୩ ଜଣ ଆତ୍ମହତ୍ୟା କରିଥିଲେ। ୮୧,୦୬୩ ଜଣ ବିବାହିତ ପୁରୁଷ ଓ ୨୮,୬୮୦ ଜଣ ବିବାହିତ ମହିଳା ଥିଲେ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲେ ମୋଟ ୧,୧୮,୯୭୯ ଜଣ ପୁରୁଷ(୭୨%) ଓ ମୋଟ ୪୫,୦୨୬ ଜଣ ମହିଳା(୨୭%) ୨୦୨୧ରେ ଜୀବନ ହାରିଥିଲେ। ବିବାହିତ ପୁରୁଷମାନେ କରୁଥିବା ଆତ୍ମହତ୍ୟା ସମସ୍ୟାର ମୁକାବିଲା ଓ ଘରୋଇ ହିଂସାର ଶିକାର ହେଉଥିବା ଅଭିଯୋଗକୁ ଗ୍ରହଣ କରିବା ପାଇଁ ଜାତୀୟ ମାନବାଧିକାର କମିଶନଙ୍କୁ ସର୍ବୋଚ୍ଚ ଅଦାଲତ ନିର୍ଦ୍ଦେଶ ଦିଅନ୍ତୁ ବୋଲି ଆବେଦନକାରୀ ଅନୁରୋଧ କରିଛନ୍ତି। ଏବେ ସର୍ବୋଚ୍ଚ ଅଦାଲତ ଏହାର ଶୁଣାଣି ସୋମବାର କରିବାକୁ ରାଜି ହୋଇଛନ୍ତି।