ଦଶମ ପରୀକ୍ଷା ଦେବେ ଜୁନିଅର ବଚ୍ଚନ

ମୁମ୍ବାଇ: ଦଶମ ପରୀକ୍ଷା ଦେବେ ଜୁନିଅର ବଚ୍ଚନ ଅଭିଷେକ । କିଏ ସ୍କୁଲରେ ପରୀକ୍ଷା ଦେଉଥିବା ବେଳେ ସେ କିନ୍ତୁ ସ୍ୱତନ୍ତ୍ର ଭାବେ ଆଗ୍ରା ଜେଲରେ ମାଟ୍ରିକ ପରୀକ୍ଷା ଦେବେ । ଆସନ୍ତା ୨୩ରେ ତାଙ୍କର ଏହି ପରୀକ୍ଷା ହେବ । ତେବେ ପ୍ରକୃତ ଜୀବନରେ ନୁହେଁ । ଜେଲ୍ ଭିତରେ ଲାଇଟ, କ୍ୟାମେରା, ଆକ୍ସନ ଭିତରେ ଅପକମିଂ ଫିଲ୍ମ ‘ଦଶବୀ’ରେ ଅଭିଷେକଙ୍କୁ କିଛି ଏଭଳି କରୁଥିବା ଦେଖିବାକୁ ମିଳିବ । ଆଗ୍ରା ସେନ୍ଟ୍ରାଲ ଜେଲରେ ଫିଲ୍ମ ଶୁଟିଂ ପାଇଁ ସମସ୍ତ ପ୍ରକାରର ପ୍ରସ୍ତୁତି ସରିଛି । ଆସନ୍ତା ୨୩ରେ ଫିଲ୍ମ ଶୁଟିଂର ଆରମ୍ଭ ହେବ । ଫିଲ୍ମର ଶୁଟିଂ ପାଇଁ ଜେଲ ପ୍ରଶାସନ ଓ ଜିଲ୍ଲା କର୍ତୃପକ୍ଷ ଠାରୁ ପ୍ରଡକ୍ସନ ଟିମ୍ ଅନୁମତି ନେଇ ସାରିଛି । ଶୁଟିଂ ପାଇଁ ଅଭିଷେକ ବଚ୍ଚନ ଆଗ୍ରାରେ ପହଁଚିଛନ୍ତି। କରୋନାକୁ ଦୃଷ୍ଟିରେ ରଖି ଜେଲ ପ୍ରଶାସନ ସମସ୍ତ ପ୍ରକାରର ବନ୍ଦୋବସ୍ତ କରିଛି । ଫିଲ୍ମର ଶୁଟିଂ ପାଇଁ ଜେଲକୁ ଆସୁଥିବା ୧ଶହ ଜଣିଆ ଟିମଙ୍କ ପାଇଁ ପରିଚୟ ପତ୍ର ଏବଂ ବାୟୋମେଟ୍ରିକ ସୁବିଧା ମଧ୍ୟ କରାଯାଇଛି । କେବଳ ସେତିକି ନୁହେଁ ଜେଲର ସର୍କଲ ନମ୍ବର ୪ରେ ଫିଲ୍ମ ଶୁଟିଂ ହେବ । ଏହି ସ୍ଥାନରୁ ଫିଲ୍ମ ମେମ୍ବରମାନ ଅନ୍ୟ କେଉଁ ଆଡ଼େ ଯାଇପାରିବେ ନାହିଁ । ଏପରିକି ଫିଲ୍ମ ଶୁଟିଂ ଦେଖିବା ପାଇଁ କଏଦୀଙ୍କୁ ମଧ୍ୟ ବାରଣ କରାଯାଇଛି । ‘ଦଶବୀ’ ଫିଲ୍ମର ଲିଡ ରୋଲରେ ଅଭିଷେକ ବଚ୍ଚନ ଥିବା ବେଳେ ତାଙ୍କ ଅପୋଜିଟରେ ୟାମୀ ଗୌତମ ଅଛନ୍ତି । ଜଣେ ବନ୍ଦୀ ନେତା କିଭଳି ଅନୁଶାସିତ ନାଗରିକ ପାଲଟୁଛନ୍ତି ତା’ ଉପରେ ଫିଲ୍ମଟି ଆଧାରିତ । କମ ପାଠପଢ଼ିଥିବା ନେତାଙ୍କୁ ଜେଲ ଦଣ୍ଡାଦେଶ ମିଳୁଛି । ଜେଲରେ ନେତାମାନଙ୍କୁ ଅନୁଶାସନର ପାଠପଢ଼ାଯାଉଛି । ଏହାପରେ ସେ ନିଜର ଦମରେ ଜେଲ ଭିତରେ ଦଶମ ପରୀକ୍ଷା ଦେଇ ପାସ୍ ମଧ୍ୟ ହେଉଛନ୍ତି । ଏଭଳି କିଛି କଥାବସ୍ତୁକୁ ନେଇ ଫିଲ୍ମଟି ଗତିଶୀଳ ।