ମହାରାଷ୍ଟ୍ରରେ କରୋନା ସଂକ୍ରମଣ ପାଇଁ ପ୍ରବାସୀ ଶ୍ରମିକ ଦାୟୀ:ରାଜ ଥାକରେ….

ରିପୋର୍ଟ କାର୍ଡ / ମୁମ୍ବଇ

ଦେଶରେ କରୋନା ସଂକ୍ରମଣ ସ୍ଥିତି ଭୟଙ୍କର ଆଡକୁ ଗତି କରୁଛି | ମହାରାଷ୍ଟ୍ରରେ ସବୁଠାରୁ କରୋନା ସଂକ୍ରମଣ ସଂଖ୍ୟା ଅଧିକରହିଛି | ପ୍ରବାସୀ ଶ୍ରମିକମାନେ ମହାରାଷ୍ଟ୍ରରେ କୋଭିଡ ସଂକ୍ରମଣର ଦ୍ରୁତ ବୃଦ୍ଧି ପାଇଁ ଦାୟୀ। ଏଭଳି ଏକ ଅଭିଯୋଗ ଆଣିଛନ୍ତି ଏମଏନଏସ ମୁଖ୍ୟ ରାଜ ଥାକରେ। ସେ କହିଛନ୍ତି ଯେ ଯେଉଁସବୁ ରାଜ୍ୟରୁ ମହାରାଷ୍ଟ୍ରକୁ ପ୍ରବାସୀ ଶ୍ରମିକମାନେ ଆସୁଛନ୍ତି, ସେହି ରାଜ୍ୟଗୁଡିକରେ ପର୍ଯ୍ୟାପ୍ତ କୋଭିଡ ପରୀକ୍ଷା ସୁବିଧା ନାହିଁ। ସେଠାରୁ ଏହି ଶ୍ରମିକମାନେ ଆସିବାପରେ ମହାରାଷ୍ଟ୍ରରେ ସଂକ୍ରମଣ ବୃଦ୍ଧିପାଉଛି। ସୂଚନାଯୋଗ୍ୟ ଯେ ମହାରାଷ୍ଟ୍ର ଭାରତର ସବୁଠାରୁ ଶିଳ୍ପୋନ୍ନତ ରାଜ୍ୟ ଏବଂ ଦେଶର ବିଭିନ୍ନ ରାଜ୍ୟରୁ ଶ୍ରମିକମାନେ ଏଠାକୁ ଜୀବିକା ଉପାର୍ଜନ ପାଇଁ ଆସୁଛନ୍ତି। ଥାକରେ କହିଛନ୍ତି, ଗତବର୍ଷ ଲକ୍‍ଡାଉନ ସମୟରେ ସେ ପ୍ରସ୍ତାବ ଦେଇଥିଲେ ଯେ ସ୍ୱସ୍ଥାନକୁ ଫେରିଯାଉଥିବା ପ୍ରବାସୀ ଶ୍ରମିକମାନଙ୍କର ସ୍ୱାସ୍ଥ୍ୟ ପରୀକ୍ଷା କରାଯିବା ଆବଶ୍ୟକ, କିନ୍ତୁ ତାହା କରାଗଲା ନାହିଁ। ଏହି ଅବସରରେ ସେ ରାଜ୍ୟ ମୁଖ୍ୟମନ୍ତ୍ରୀ ଉଦ୍ଧବ ଥାକରେଙ୍କ ସହିତ ଭର୍ଚୁଆଲ ପଦ୍ଧତିରେ ଆଲୋଚନା କରିବା ଅବସରରେ କ୍ରୀଡାବିତମାନଙ୍କୁ ସେମାନଙ୍କର ଅଭ୍ୟାସ କାର୍ଯ୍ୟକ୍ରମରେ ଯୋଗଦେବା ଏବଂ ସାମାଜିକ ଦୂରତା ବଜାୟ ରଖି ଜିମ୍‍ନାସିୟମ ଖୋଲିବା ପାଇଁ ଅନୁମତି ଦେବାକୁ ମୁଖ୍ୟମନ୍ତ୍ରୀଙ୍କୁ କହିଥିଲେ।  ସୋମବାର ରାତିରୁ ମହାରାଷ୍ଟ୍ରରେ ଲାଗୁ ହୋଇଥିବା ନୂଆ କଟକଣାଗୁଡିକ ସମ୍ପର୍କରେ ପ୍ରକାଶକରି ମହାରାଷ୍ଟ୍ର ନବନିର୍ମାଣ ସେନା (ଏମଏନଏସ)ର ସଭାପତି ରାଜ ଥାକରେ କହିଥିଲେ, ଏହି ସମୟ ମଧ୍ୟରେ ସମସ୍ତ ଦୋକାନ ଅନ୍ତତଃ ଦୁଇ ଅଥବା ତିନିଦିନ ଖୋଲା ରଖାଯିବା ଉଚିତ। ଅନ୍ୟପକ୍ଷରେ କଳକାରଖାନାରେ ଉତ୍ପାଦନ ଚାଲୁ ରହିବ।