ସୁପ୍ରିୟା ସୁଲେ,ପ୍ରଫୁଲ ପଟେଲ ଏନସିପିର କାର୍ଯ୍ୟକାରୀ ସଭାପତି…..

ରିପୋର୍ଟ କାର୍ଡ / ନୂଆଦିଲ୍ଲୀ

ନ୍ୟାଶନାଲିଷ୍ଟ କଂଗ୍ରେସ ପାର୍ଟି ର କାର୍ଯ୍ୟକାରୀ ସଭାପତି ଭାବେ ନିଯୁକ୍ତି ପାଇଛନ୍ତି ବରିଷ୍ଠ ନେତା ପ୍ରଫୁଲ ପଟେଲ ଓ ସାଂସଦ ସୁପ୍ରିୟା ସୁଲେ। ଏନସିପିର ସଭାପତି ଶରଦ ପାୱାର ଏହା ଘୋଷଣା କରିଛନ୍ତି। ଆଜିକୁ ଏନସିପି ଗଠନ ୨୫ ବର୍ଷ ପୂରିଛି। ୨୫ ବର୍ଷ ତଳେ ଅର୍ଥାତ ୧୯୯୯ରେ ଶରଦ ପାୱାର ଓ ପିଏ ସାଙ୍ଗମା ମିଳିତ ଭାବେ ଏନସିପି ଗଠନ କରିଥିଲେ। ଦଳ ପ୍ରତିଷ୍ଠାର ୨୫ ବର୍ଷ ଉପଲକ୍ଷେ ସ୍ୱତନ୍ତ୍ର କାର୍ଯ୍ୟକ୍ରମର ଆୟୋଜନ କରାଯାଇଛି। ଏହି ସମୟରେ ଶରଦ ପାୱାର ଏପରି ଘୋଷଣା କରିଛନ୍ତି। ଏନସିପି ନେତା ଛଗନ ଭୂଜବଳ କହିଛନ୍ତି, “ପ୍ରଫୁଲ ପଟେଲ ଓ ସୁପ୍ରିୟା ସୁଲେଙ୍କୁ କାର୍ଯ୍ୟକାରୀ ସଭାପତି କରିବାର ଅନେକ କାରଣ ହୋଇଛି।ଏହାଦ୍ୱାରା ବିଭିନ୍ନ ନିର୍ବାଚନ ଓ ରାଜ୍ୟସଭା ଏବଂ ଲୋକସଭାର କାମ ଭାଗଭାଗ କରାଯାଇ ପାରିବ। ନିର୍ବାଚନ ଆସୁଥିବାରୁ ସେମାନଙ୍କ କାନ୍ଧରେ ଅଧିକ ଦାୟିତ୍ୱ ନ୍ୟସ୍ତ କରାଯାଇଛି। ୨୦୨୪ ଲୋକସଭା ନିର୍ବାଚନର କାମ ପାଇଁ ଏପରି ପଦକ୍ଷେପ ନିଆଯାଇଛି।”