ରାହୁଲଙ୍କୁ ମିଳିଳା ଜାମିନ…..

ରିପୋର୍ଟ କାର୍ଡ / ନୂଆଦିଲ୍ଲୀ

ଏକ ମାନହାନି ମାମଲାରେ ଝାଡ଼ଖଣ୍ଡର ଚାଇଁବାସାସ୍ଥିତ ସ୍ବତନ୍ତ୍ର ଏମପି/ଏମଏଲଏ କୋର୍ଟ ବୁଧବାର କଂଗ୍ରେସ ସାଂସଦ ତଥା ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଜାମିନ ପ୍ରଦାନ କରିଛନ୍ତି। ସୂଚନାଯୋଗ୍ୟ ୨୦୧୮ରେ ଚାଇଁବାସାଠାରେ କଂଗ୍ରେସର ଏକ ସମ୍ମିଳନୀକୁ ସମ୍ବୋଧିତ କରୁଥିବାବେଳେ ରାହୁଲ ସ୍ବରାଷ୍ଟ୍ର ମନ୍ତ୍ରୀ ତତ୍କାଳୀନ ବିଜେପି ସଭାପତି ଅମିତ ଶାହା (ବର୍ତ୍ତମାନ ସ୍ବରାଷ୍ଟ୍ର ମନ୍ତ୍ରୀ)ଙ୍କୁ ହତ୍ୟାକାରୀ ବୋଲି ମନ୍ତବ୍ୟ ଦେଇଥିଲେ। ଫଳରେ ପ୍ରତାପ କଟିୟାର ନାମକ ଜଣେ ବ୍ୟକ୍ତି ରାହୁଲଙ୍କ ବିରୋଧରେ ମାନହାନି ମୋକଦ୍ଦମା ରୁୁଜୁ କରିଥିଲେ। ଏହି ମାମଲା ଖାରଜ କରିବାକୁ ରାହୁଲ ଯେଉଁ ଆବେଦନ କରିଥିଲେ, ତାହାକୁ ଝାଡଖଣ୍ଡ ହାଇକୋର୍ଟ ଚଳିତବର୍ଷ ଫେବୃଆରୀରେ ଖାରଜ କରିଦେଇଥିଲେ। ସମନ ଜାରି ସତ୍ତ୍ବେ ହାଜର ହେଉନଥିବାରୁ ଚଳିତବର୍ଷ ଫେବୃଆରୀ ୨୭ରେ ସ୍ବତନ୍ତ୍ର ଏମପି/ଏମଏଲଏ କୋର୍ଟ ରାହୁଲଙ୍କ ବିରୋଧରେ ଜାମିନ ବିହୀନ ପରୱାନା ଜାରି କରିଥିଲେ। ଏହାର ପ୍ରତିବାଦରେ ରାହୁଲ ଝାଡ଼ଖଣ୍ଡ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ। ହାଇକୋର୍ଟ ଏହି ପରୱାନା ଉପରେ ରହିତାଦେଶ ଜାରି କରିଥିଲେ। ଏମପି/ଏମଏଲଏ କୋର୍ଟ ଦ୍ବିତୀୟ ଥର ଜାମିନ ବିହୀନ ପରୱାନା ଜାରି କରିବା ସହ ଜୁନ ୨୬ରେ ହାଜର ହେବାକୁ ରାହୁଲଙ୍କୁ ନିର୍ଦେଶ ଦେଇଥିଲେ। ରାହୁଲ ପୁଣି ହାଇକୋର୍ଟରେ ପିଟିସନ ଦାଏର କରିଥିବାବେଳେ ତାଙ୍କୁ ନିମ୍ନ ଅଦାଲତରେ ହାଜର ହେବାକୁ ନିର୍ଦେଶ ମିଳିଥିଲା। ତଦନୁଯାୟୀ ଅଗଷ୍ଟ ୬ରେ ରାହୁଲ ହାଜର ହେବାପରେ ତାଙ୍କୁ ଜାମିନ ପ୍ରଦାନ କରାଯାଇଛି।