ଜନସେବା ଉଦ୍ଦେଶ୍ୟରେ ବିଜେଡିରେ ମିଶିଲେ ପ୍ରଦୀପ ମାଝୀ…..

ରିପୋର୍ଟ କାର୍ଡ / ଭୁବନେଶ୍ୱର

ସବୁ ଅପେକ୍ଷାର ଅନ୍ତଘଟାଇ ଶେଷରେ ଆଜି ବିଜେଡିରେ ମିଶିଲେ କଂଗ୍ରେସର ପୂର୍ବତନ ସାଂସଦ ପ୍ରଦୀପ ମାଝୀ। ବିଧିବଦ୍ଧ ଭାବେ ସବୁଚର୍ଚ୍ଚାର ପୂର୍ଣ୍ଣଛେଦ ଟାଣି ପ୍ରଦୀପ ନବରଙ୍ଗପୁରରେ ଆୟୋଜିତ ସ୍ୱତନ୍ତ୍ର ସମାରୋହରେ ଶାସକ ଦଳ ବିଜେଡିରେ ଯୋଗ ଦେଇଛନ୍ତି | ଏହି ସଭାରେ ବିଜେଡିର ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ, ସାଂସଦ ରମେଶ ମାଝୀଙ୍କ ଉପସ୍ଥିତିରେ ଦଳରେ ସାମିଲ ହେଲେ ପ୍ରଦୀପ। ଏହାସହ କିଛି ବରିଷ୍ଠ କଂଗ୍ରେସ ନେତା ମଧ୍ୟ ବିଜେଡିରେ ସାମିଲ ହୋଇଛନ୍ତି | ଏଥିପାଇଁ ନବରଙ୍ଗପୁର ସର୍କିଟ ହାଉସ ପଡ଼ିଆରେ ବ୍ୟାପକ ଆୟୋଜନ ହୋଇଥିଲା। ଏହି ମିଶ୍ରଣ କାର୍ଯ୍ୟକ୍ରମରେ ଭର୍ଚୁଆଲ୍‌ ମାଧ୍ୟମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗ ଦେବା ସହ ବିଜେଡିର କିଛି ବରିଷ୍ଠ ନେତା ଓ ମନ୍ତ୍ରୀ ସଭା ସ୍ଥଳରେ ଉପସ୍ଥିତ ରହିଥିଲେ। ସେପଟେ, ବିଜେଡିରେ ଯୋଗ ଦେବା ନେଇ ପ୍ରଦୀପ ମାଝି ପ୍ରତିକ୍ରିୟା ରଖି କହିଛନ୍ତି, ‘ଜନସେବା ଓ ଅଞ୍ଚଳର ଉନ୍ନତି ହେଉଛି ମୂଳ ଉଦ୍ଦେଶ୍ୟ । ଦଳ ପରିବର୍ତ୍ତନ ହେଲେ ଆଭିମୁଖ୍ୟ କିମ୍ବା ଉଦ୍ଦେଶ୍ୟରେ କୌଣସି ପରିବର୍ତ୍ତନ ହୋଇନଥାଏ। କଂଗ୍ରେସ ଦଳରେ ରହି ଯେଭଳି ଭାବରେ ଲୋକଙ୍କ ସେବା କରୁଥିଲୁ, ଠିକ୍‌ ସେଭଳି ଭାବେ ବିଜେଡିରେ ରହି ମଧ୍ୟ ଲୋକଙ୍କ ସେବା କରିବୁ।’ ତେବେ ମୋଟ୍‌ ଉପରେ ଚର୍ଚ୍ଚାର ଅନ୍ତ ହୋଇଛି ଏବଂ ପ୍ରଦୀପ ଦଳରେ ସାମିଲ ହୋଇଛନ୍ତି।