ଟିକା ନେଲେ ମିଳିବ ‘ବିୟର୍‌’……

ରିପୋର୍ଟ କାର୍ଡ / ନୂଆଦିଲ୍ଲୀ

ଆସନ୍ତା ଜୁଲାଇ ୪ ତାରିଖ ଛୁଟିଦିନ ପୂର୍ବରୁ ଅଧିକରୁ ଅଧିକ ଆମେରିକୀୟମାନଙ୍କୁ ଟିକା ଦିଆଇବା ଲାଗି ରାଷ୍ଟ୍ରପତି ଜୋ ବାଇଡେନ୍‌ ‘ଅଭିଯାନ ମାସ’ ଘୋଷଣା କରିଛନ୍ତି | ଏହି ଅଭିଯାନରେ ଘୋଷଣା ହୋଇଛି କି ଟିକା ନେଉଥିବା ବ୍ୟକ୍ତିବିଶେଷଙ୍କୁ ହ୍ବାଇଟ୍‌ ହାଉସ୍‌ ତରଫରୁ ମାଗଣାରେ ‘ବିୟର୍‌’ ଦିଆଯିବ । ହ୍ବାଇଟ୍‌ ହାଉସ୍‌ରେ ଆମେରିକାର ଟିକାକରଣ ଯୋଜନାର ସଦ୍ୟତମ ରିପୋର୍ଟ ଘୋଷଣା କରିବା ସହ ସ୍ବାଧୀନତା ଦିବସ ପୂର୍ବରୁ ୭୦% ପ୍ରାପ୍ତ ବୟସ୍କଙ୍କୁ ଆଂଶିକ ଟିକା ଦେବା ଲାଗି କରିଥିବା ଯୋଜନା ସଂକ୍ରାନ୍ତରେ ରାଷ୍ଟ୍ରପତି ବାଇଡେନ୍‌ କହିଛନ୍ତି । ଚଳିତ ଗ୍ରୀଷ୍ମଋତୁ ସୁଦ୍ଧା ଆମେରିକାକୁ ପ୍ରାକ୍‌-ମହାମାରୀ ଅବସ୍ଥାକୁ ଫେରାଇ ନେବା ତାଙ୍କର ଲକ୍ଷ୍ୟ ବୋଲି ସେ ଗୁରୁତ୍ବାରୋପ କରିଛନ୍ତି। ଏହା ବ୍ୟତିରେକେ, ଆମେରିକୀୟମାନଙ୍କୁ ଟିକା ଦିଆଯିବା ଗତିଶୀଳତା ବଜାୟ ରଖିବା ଲାଗି ପାନୀୟ ନିର୍ମାତା ‘ଆନ୍‌ହାଇଜର୍‌-ବୁସ୍‌’ ମଧ୍ୟ ନଗଦ ଟଙ୍କା ବଣ୍ଟନ, ଖେଳ ଦେଖି ଯିବା ଲାଗି ଟିକେଟ୍‌ କିଂବା ସବେତନ ଛୁଟି ଆଦି ବ୍ୟବସ୍ଥା କରିଛି। ହ୍ବାଇଟ୍‌ ହାଉସ୍ କହିଛି ଯେ, ଆମେରିକୀୟମାନଙ୍କୁ ଟିକା ନେବା ଲାଗି ଉତ୍ସାହ ଦେବା ପାଇଁ ବାଇଡେନ୍‌ଙ୍କ ‘ଅଭିଯାନ ମାସ’ରେ ସରକାରୀ ଓ ବେସରକାରୀ ସହଯୋଗିତା ଉପଯୋଗ କରାଯିବ। ଟିକାକରଣର ଉପକାରିତା ଏବଂ ଟିକା ନେବା ଲାଗି ବାର୍ତ୍ତା ପ୍ରସାର କରିବା ପାଇଁ ଏହି ଅଭିଯାନରେ ବ୍ୟବସାୟିକ ପ୍ରତିଷ୍ଠାନ, ପ୍ରଭାବଶାଳୀ ସାମାଜିକ ଗଣମାଧ୍ୟମ ବ୍ୟବହାରକାରୀ, କଲେଜ୍‌, ସେଲିବ୍ରିଟି ଏବଂ ଗୋଷ୍ଠୀକେନ୍ଦ୍ରିକ ପ୍ରତିଷ୍ଠାନଗୁଡ଼ିକୁ ସାମିଲ କରାଯିବ।