ଦ୍ୱାଦଶ ଶ୍ରେଣୀ ବୋର୍ଡ ପରୀକ୍ଷା ବାତିଲ ମାମଲାର ପରବର୍ତ୍ତୀ ଶୁଣାଣି ୩୧ରେ ହେବ…..

ରିପୋର୍ଟ କାର୍ଡ / ନୂଆଦିଲ୍ଲୀ

କୋଭିଡ ମହାମାରୀ ମଧ୍ୟରେ ଦ୍ୱାଦଶ ଶ୍ରେଣୀ ବୋର୍ଡ ପରୀକ୍ଷା ବାତିଲ ପାଇଁ ଆବେଦନ ଉପରେ ସୁପ୍ରିମକୋର୍ଟ ଆଜି ଶୁଣାଣି କରିଛନ୍ତି। ତେବେ ଅଦାଲତ ଏହି ମାମଲାର ଶୁଣାଣି ସ୍ଥଗିତ ରଖିଛନ୍ତି। ଜଷ୍ଟିସ୍ ଏ.ଏମ ଖାନୱିଲକରଙ୍କ ଅଧ୍ୟକ୍ଷତାରେ ଗଠିତ ଏକ ବେଞ୍ଚ ଆବେଦନକାରୀଙ୍କୁ କେନ୍ଦ୍ର, ସିବିଏସ୍ଇ ଏବଂ ଆଇସିଏସ୍ଇ ବୋର୍ଡ ଓ ପ୍ରତିବାଦୀମାନଙ୍କୁ ଅଗ୍ରୀମ କପି ଦେବାକୁ କହିଛନ୍ତି । ମାମଲାର ପରବର୍ତ୍ତୀ ଶୁଣାଣି ଚଳିତ ମାସ ୩୧ ରେ ହେବ। ସୁପ୍ରିମକୋର୍ଟର ଓକିଲ ମମତା ଶର୍ମା କୋଭିଡ ମହାମାରୀ ମଧ୍ୟରେ ସିବିଏସ୍ଇ ଏବଂ ଇଣ୍ଡିଆନ୍ ସ୍କୁଲ୍ ସାର୍ଟିଫିକେଟ୍ ପରୀକ୍ଷା ପରିଷଦ (ଆଇସିଏସଇ) ଦ୍ୱାରା ପରିଚାଳିତ ଦ୍ୱାଦଶ ଶ୍ରେଣୀ ପରୀକ୍ଷାକୁ ବାତିଲ କରିବାକୁ ଆବେଦନ କରିଛନ୍ତି। ଆବେଦନକାରୀ ମଧ୍ୟ ପରୀକ୍ଷା ପରିଚାଳନା କରୁଥିବା ଅଧିକାରୀମାନଙ୍କୁ ଅନୁରୋଧ କରିଛନ୍ତି ଯେ ଅବଜେକ୍ଟିଭ୍ ସିଷ୍ଟମ ଉପରେ ଆଧାର କରି ସମୟ ସୀମା ମଧ୍ୟରେ ଦ୍ୱାଦଶ ଶ୍ରେଣୀ ଫଳାଫଳ ଘୋଷଣା କରାଯିବା ଉଚିତ୍। ମହାମାରୀକୁ ଦୃଷ୍ଟିରେ ରଖି ପ୍ରାୟ ସାତ ହଜାର ପିତାମାତା ମଧ୍ୟ ଦ୍ୱାଦଶ ବୋର୍ଡ ପରୀକ୍ଷା ବାତିଲ କରିବାକୁ ସୁପ୍ରିମକୋର୍ଟଙ୍କୁ ଅନୁରୋଧ କରିଛନ୍ତି। ସୂଚନାନୁସାରେ, ପରୀକ୍ଷା ସମ୍ବନ୍ଧୀୟ ନିଷ୍ପତ୍ତି ଜୁନ୍ ୧ରେ ଘୋଷଣା କରାଯିବ ବୋଲି ଆଶା କରାଯାଉଛି। ୨୩ ମଇରେ ଅନୁଷ୍ଠିତ ଉଚ୍ଚସ୍ତରୀୟ ବୈଠକର ନିର୍ଦ୍ଦେଶ ଅନୁଯାୟୀ ରାଜ୍ୟ ସରକାରମାନେ ଏହି ପ୍ରସଙ୍ଗରେ ୨୫ ମଇ ସୁଦ୍ଧା ନିଜର ପରାମର୍ଶ ଦେଇସାରିଛନ୍ତି।